Politika -
Hauteskundeak Frantzian
Alain Rousset, berriro garaile Ipar Euskal Herrian
Sozialistek eta ekologistek osatutako aliantzak botoen % 44 eskuratu ditu. Zentro-eskuinak botoen % 34 lortu ditu, eta Fronte Nazionala da hirugarren indarra.
EITB.EUS
Akitania Limousin Poitou-Charentes eskualdeak ezkerreko gobernua izango du datozen sei urteetan ere.
Frantziako eskualdeetako hauteskundeen bigarren itzulian, sozialistek eta ekologistek osatutako ezkerreko koalizioa atera da garaile eskualde horretan, botoen % 44,27 lortuta.
Alain Roussetek eskualdeko Presidentetzari eutsiko dio, horrenbestez. Hein batean, parte-hartzearen gorakadari zor dio hautagai sozialistak garaipena; lehen itzulian, % 46,57koa izan zen; atzo, % 54koa. Emaitza horien ondorioz, 183 aulkietatik 107 ezkerrarentzat izango dira.
Zentro-eskuineko koalizioak botoen % 34,06 eskuratu ditu.
Fronte Nazionala hirugarren indarra izango da Akitaniako Kontseiluan, 29 aulkirekin. Botoen % 21,67 lortu zituen atzo, lehen itzulian baino ia bi puntu gutxiago (% 23,23). Radio Euskadiri egindako adierazpenetan, emaitza horiekin "pozik" agertu da Jean Michel Iratchet Fronte Nazionaleko kidea, Pirinio Atlantikoen Kontseiluan ordezkaritza lortu baitute.
