Politika -
AUZITEGI NAZIONALA
Twitterren 'ETA justifikatzea' egotzita, urtebeteko kartzela-zigorra
Txioen bidez, ETAren biktimak umiliatzea eta Cristina infantari mehatxu egitea ere leporatu diote auzipetutako bilbotar gazteari.
AGENTZIAK | ERREDAKZIOA
Twitterren terrorismoa goratzea egotzita, urtebeteko kartzela-zigorra ezarri diote, Auzitegi Nazionalean, Ibai Otxoa gazte bilbotarrari. Txioen bidez, "ETA justifikatzea, ETAren biktimak umiliatzea, indarkeria sustatzea eta Cristina infantari mehatxu egitea" leporatu dio epaileak.
Epaiketa abiatu aurretik, Otxoak akordioa lortu du Juan Antonio Garcia Jabaloy fiskalarekin (urte eta erdiko kartzela-zigorra ezartzea eskatzen zuen fiskalak hasieran). Horrela, leporatu dizkioten ekintzak onartu ditu akusatuak, eta urtebeteko kartzela-zigorra onartu du. Zazpi hilabeteko erabateko gaitasungabetzea ere ezarri diote.
Kepa Landa defentsaren abokatuak zigorra bertan behera uztea eskatu du, Zigor Kodearen 82. artikuluan oinarrituta; besteak beste, akusatuak aurrekaririk ez duela defendatu du.
Zigorra baliogabetzeko eskaria ontzat eman du fiskalak, eta datozen egunotan ebatziko du epaileak horren inguruan.
