Politika -

Inbestidura negoziazioak

Astearte honetan berriz bilduko dira PSOE, Podemos, IU eta Compromis

Alderdi ezkertiarrak bilduta zeudela, Pedro Sanchez eta Albert Rivera sekretupean batzartu dira. Litekeena da PSOE-Ciudadanos ituna hurbilago egotea.

PSOE, Podemos, IU eta Compromiseko talde negoziatzaileak, bilera hasieran. Argazkia: EFE
PSOE, Podemos, IU eta Compromiseko talde negoziatzaileak, bilera hasieran. Argazkia: EFE
PSOE, Podemos, IU eta Compromis alderdien arteko bilera

AGENTZIAK | ERREDAKZIOA

Whatsapp Facebook Twitter Telegram Email

PSOEk bi bilera egin ditu aldi berean Diputatuen Kongresuan, inbestidura akordioa lortzea xede. Gela batean, ezkerreko alderdiekin bildu dira negoziatzaile sozialistak, hots, Podemosekin, IUrekin eta Compromisekin, eta, beste batean, Ciudadanosekin.

Gainera, Pedro Sanchez PSOEko idazkari nagusia eta Albert Rivera Ciudadanoseko presidentea sekretupean bildu dira Kongresuan, inbestidurarako akordio bat ixteko asmoz.

Alderdi ezkertiarrekin egindako bilera 16:45 inguruan hasi da, eta 21:10ean bukatu.

Bestalde, Ciudadanosekin egindako bileran, Jose Enrique Serrano PSOEko aholkulariak hartu du parte. Ciudadanosen aldetik, Manuel Villegas idazkariorde nagusia, Juan Carlos Girauta bozeramailea eta Manuel Gutierrez talde parlamentarioaren idazkari nagusia izan dira.

PSOE-Ciudadanos isilpeko bilera

Sanchezen eta Riveraren arteko batzarra ez zegoen iragarrita, ezta bi alderdi horien talde negoziatzaileek egin duten ere. 21:00ak inguruan, Sanchez Kongresuan ikusi ostean, jakin da bi alderdietako buruzagiak bildu egin direla.

Joan den astean iragarri zuten PSOEko eta Ciudadanoseko bozeramaileek negoziazioak aurreratuta zituztela eta programako zenbait puntu adostuta zituztela. Ciudadanosek ohartarazi zuen ituna egiteko akordioak globala behar duela izan. PSOE, berriz, baikorrago azaldu zen eta akordioa astearte honetan bertan ixteko itxaropena agertu zuen.

Gauzak horrela, Albert Riverak astearte goizean (11:00) deitu duen prentsaurrekoaren harira ikusmin handia piztu da.

PSOE-Podemos batzarra

Bestalde, Alderdi Sozialistak eta Podemosek aldebiko batzarra egingo dute astearte arratsaldean, proposamenak negoziatu  eta adosteko asmoz, eta ondoren Compromisekin eta IUrekin batzartuko dira berriro.

Gaur ia bost orduz bilduta egon ostean, Alberto Garzon IUko diputatu eta bileraren sustatzaileak azaldu duenez, lau alderdiek komunikazio kanala zabalik mantentzea adostu dute, eta berriz ere batzartuko dira astearte honetan, baina aurretik aldebiko bilerak izango dira.

Horrenbestez, astearte honetan bilduko dira lehen aldiz PSOEren eta Podemosen talde negoziatzaileak, bakarka.

Lau alderdien arteko batzarra 20:00etarako iragarri dute.

PSOEk Ciudadanos ezinbestekoa dela dio

Bilera amaituta, lau alderdietako bozeramaileek agerraldiak egin dituzte.

Antonio Hernandok (PSOE) adierazi du gobernua osatzeko akordioa posible izateko Ciudadanos ezinbestekoa dela.

“Aldaketa nahi badugu, transbertsalitatetik izan beharko da. 161 diputaturekin ez da aldaketaren gobernurik izango, talde independentisten babesarekin ez bada behintzat, eta guk aukera horri ezetz esan diogu”, azpimarratu du Alderdi Sozialistaren bozeramaileak.

“Aldaketaren alderdiak ados jartzen bagara eta PPk ez bezala bozkatuz gero, aldaketaren gobernua izango da”, berretsi du.

Iñigo Errejon (Podemos) baikor agertu da programari buruz lau alderdien artean ituna lortzeko, baina horrekin nahikoa ez dela gogoratu du; izan ere, Podemosek hasieratik esan du kolazio-gobernua osatzeko ituna nahi dutela.

“Akordioa eskura daukagu”, azpimarratu du Errejonek prentsaurrekoan. Ildo horretan, PSOEri ohartarazi dio Ciudadanosen babesarekin nahikoa ez duela eta, beraz, gobernua ezkerreko alderdiekin eratzen ahalegintzeko dei egin dio berriro.

Alberto Garzon (IU) ere baikor azaldu da, programa bateragarriak dituztela eta, akordioa posible dela iritzita.

Nolanahi ere, bakoitzak bere eskuan dagoena egiteko eskatu du, azken asteotako “etsai-giroa” baretzeko.

Lehendabiziko bilera honetan “politika zehatzak” izan dituzte hizpide eta ez dira balizko kargu banaketaz aritu.

Errejonek eta Garzonek bezala, Joan Baldovik (Compromis) ere uste lau alderdien arteko ituna posible dela.

Negoziazioak “behar duen iraupena” izango duela adierazi ostean, lau alderdietan antzeman du adostasunetara heltzeko asmoa. Alabaina, onartu du PSOEk erdibidean dagoela eta erabaki egin behar duela: ituna Ciudadanosekin edo ezkerreko alderdiekin.

Hau zure interesekoa bada, baliteke beste gai hauek ere izatea
Alderdi Sozialista IU Espainia bideoak Alderdi politikoak berriak Podemos albisteak