Kontzertu Ekonomikoaz 'ezjakina' izatea egotzi dio Erkorekak C’s-i

Kontzertu Ekonomikoaz "ezjakintasuna" izatea egotzi dio Josu Erkoreka Eusko Jaurlaritzako bozeramaileak Ciudadanos alderdiari, eta Europako markoaren baitan "primeran" bat egiten duela ziurtatu du.

Kontzertu Ekonomikoak ezingo duela Europaren baitan luzaroan iraun esan zuen atzo Ines Arrimadas Ciudadanos alderdiaren Kataluniako buruzagiak, nahiz eta onartu zuen gaur egun Espainiako Konstituzioan jasota dagoela. Gaur, Eusko Jaurlaritzak erantzun dio Ciudadanosi.

Eusko Jaurlaritzaren gobernu bileraren osteko agerraldian Erkorekak nabarmendu duenez, alderdi laranjak Kontzertu Ekonomikoari buruzko ezjakintasuna ei du. "Dokumentatuta dagoen hiritar ororen gisan, Kontzertu Ekonomikoak Europaren estaldura duela jakin beharko luke Ciudadanosek", gaineratu du.

Ildo horretan, Luxenburgoko bi epairi egin die erreferentzia, zeinen baitan "autonomien finantza erregimenak bateragarriak dira zuzenbide europarrarekin". "Ez dakit Ciudadanosek nondik atera duen bateraezinak direla dioen eta berandu baino lehenago Europak Kontzertu Ekonomikoa bertan behera utziko due kontu hori", nabarmendu du.

Josu Erkorekaren hitzetan, gaur egun jakina da Kontzertu Ekonomikoak "primeran" uztartzen dela Europar Batasunaren baitan. Horrenbestez, ezjakintasuna tarteko, "hainbat alderdi politikok" Kontzertu Ekonomikoa kritikatzea salatu du.