Politika -
ESTATUKO GOBERNAGARRITASUNA
Alonsoren ustez Estatuko gobernagarritasunean aurrerapausoak eman dira
Alfonso Alonsoren arabera, EAEko eta Galiziako hauteskundeetan herritarrek egonkortasunaren alde bozkatu dute, eta ez alderdi batzuek egiten duten blokeoaren alde.
AGENTZIAK | ERREDAKZIOA
Euskadiko popularren presidentearen arabera, EAEko eta Galiziako hauteskundeek Espainiako balizko gobernagarritasunaren alde aurrerapausoak ematen lagundu dute, izan ere, herritarrek egonkortasunaren alde bozkatu dute eta ez blokeo edo “populismoen” alde.
PSOEren barne zatiketari erreferentzia eginez, hauteskunde hauen emaitzek “blokeoaren alde” dauden alderdiei eragiten diela esan du eta horren aurrean gogoeta egiteko eskatu dio alderdi sozialistari.
PPk Euskadin lortu dituen emaitzei dagokienez, “onak” izan direla eta etorkizuneko proiektu zabalago baten lehenengo pausoa direla azpimarratu du. Era berean, Eusko Legebiltzarrean gehiengorik ez dagoela, eta, Alderdi Popularrak zubiak eraikitzen badakiela eta erakutsi egingo duela esan du.
“Nire konpromisoa egonkortasuna ematea eta Katalunian hasi duten zatiketa prozesua ekiditea izango da”, gaineratu du.
Espainiako gobernagarritasunari dagokionez, Diputatuen Kongresuan izan behar den eztabaida politikoa telebistetan egiten ari dela salatu du.