Politika -

Ekitaldia

Iñigo Urkulluk lehendakari karguaren zina egin du

Erakundeetako ordezkariak, politikagintzako, ekonomiako eta justizia alorretako kideak eta euskal gizarteko ordezkariak izan dira ekitadian.

Karguaren zina egin du Iñigo Urkulluk bigarrenez jarraian

2:01

AGENTZIAK | ERREDAKZIOA

Whatsapp Facebook Twitter Telegram Email

Iñigo Urkulluk lehendakari kargua hartu du Gernikako Batzar-etxean egingo den ekitaldian. Bertan izan dira erakundeetako ordezkariak, politikagintzako, ekonomiako eta justizia alorretako kideak eta euskal gizarteko ordezkariak.

Hamabietarako minutu gutxi falta zirela heldu da Urkullu Gernikako Batzar-etxera. Emaztearekin batera heldu da, eskuan aginte-makila zuela. Bertaratu direnek txalo artean hartu dute lehendakaria.

Ondoren, Legebiltzarreko presidenteak, Bakartxo Tejeriak, eta Legebiltzarreko Mahaiko kideek harrera egin diote. Elkarrekin sartu dira Batzar-etxean.

URKULLU KARGUAREN ZINA GERNIKAN EITB

Saioari hasiera eman ondoren, Batzar-etxearen kanpoko aldera irten da Urkullu Legebiltzarreko presidentearekin eta Mahaiko kideekin batera. Gernikako aritzaren azpian egin du zin.

Formula tradizionala

Duela lau urte karguaren zina egiteko erabili zuen formula berdina erabili du. Jose Antonio Agirrek, Carlos Garaikoetxeak, Jose Antonio Ardanzak eta Juan Jose Ibarretxek erabilitakoaren antzekoa da, baina aldaketa txikiekin. Urkulluk Bizkaiko Foru Zaharra jasotzen duen XVII. mendeko liburu baten eta Gernikako Estatutuaren ale baten gainean eskuak jarrita egin du karguaren zina, euskaraz.

Zin egiteko erabili duen esaldia honakoa da: "Apal-apalik, Jaungoikoaren eta gizartearen aurrean, eusko-lur gainean zutik eta Gernikako aritzaren azpian asaben gomutaz? herri-ordezkari zareten zuen aurrean nire agintea zintzo beteko dudala, zin dagit".

URKULKU KARGUAREN ZINA GERNIKA EITB

?Denentzako Euskadi baten alde eta Euskadi hobe baten alde? lan egingo duela agindu du Urkulluk Gernikako Batzar-etxeko sinadura-liburuan idatzi duen testuan.

Zin egitearen ondoren, Ertzaintzaren musika bandak Euskadiko ereserkia jo du eta dantzariek aurreskua dantzatu dute.

Urkulluren familiak bertatik bertara eta emozioz jarraitu du ekitaldia Gernikako Zuhaitzaren albo batean. Bertan izan dira Urkulluren ama, Lucia Arieta-Araunabeña emaztea, eta Karlos, Kerman eta Malen seme-alabak.

Ohorezko aurreskuaren ondoren, lehendakaria Gernikako Batzar-etxean sartu da berriz ere. Bertaratu direnek txalo artean eta zutik hartu dute.

Hemizikloaren barruan, lehendakariak juntetxeko tribunatik hartu du hitza, eta karguaren jabetzaren adierazpena egin du. Urkulluk aditzera eman du Koroari leial izango zaiola eta Konstituzioa, Gernikako Autonomia Estatutua eta indarrean dauden gainerako legeak errespetatuko dituela. Karguaren jabetza hartu ondoren, guztiek zutik entzun dute Agur Jaunak.

Urkulluk aginte-makila Batzar-etxera bertaratu direnei eskaini die, bai aretoan zeudenei, baita kanpoko aldean zeudenei ere.

urkullu-karguaren-zina_

Ondoren, lehendakaria Zuhaitz Zaharra dagoen lekura gerturatu da. Isilean hainbat minutuz egon da zuhaitzaren aurrean.

Gonbidatuak

Ekitaldi solemnean 300 gonbidatu baino gehiago izan dira. Horien artean zeuden Soraya Saenz de Santamaria, Espainiako gobernuko presidenteordea, Carles Puigdemont, Kataluniako presidentea, Fernando Clavijo, Kanarietako presidentea, eta Uxue Barkos, Nafarroako presidentea.

Legebiltzarreko 75 legebiltzarkideak eta Gernikan izan dira. Horrez gain, ekitaldian parte hartu dute erakundeetako ordezkariek, politikagintzako, ekonomiako eta justizia alorretako kideek eta euskal gizarteko ordezkariek.

"Lan egiteko borondatea"

Soraya Saenz de Santamariak ?leialtasuna eta elkar ulertzeko borondatea? helarazi dizkio gaur Eusko Jaurlaritza berriari.

Gernikan egin den ekitaldiaren amaieran kazetariei adierazi dienez, ?Espainiako gobernuaren izenean zorterik handiena, eta leialtasuna eta elkar ulertzeko borondatea? helarazi dizkio Urkulluri. ?Denok elkarrekin lan egiteko unea? dela uste du Saenz de Santamariak.

Euskadik Kataluniaren laguntza "aurkituko du"

Carles Puigdemont Generalitateko presidenteak errespetua agertu dio Euskadik bere etorkizunaren gainean hartuko duen "aukerari", eta, baieztatu duenez, Kataluniaren laguntza "aurkituko du" hala behar duen orotan. Ekitaldian zehar Soraya Saenz de Santamaria Espainiako Gobernuko presidenteordearen aldamenean egotea egokitu zaio Puigdemonti, baina esan duenaren arabera "kortesiazko hitzak" besterik ez dituzte trukatu. Horrez gain, deitoratu egin du Estatua "desagertu" egiten dela hitzarmenei buruz hitz egiten zaionean.

Bestalde, Puigdemontek plazertzat jo du eta "pozik" azaldu "Eusko Jaurlaritzako ordezkari gorenari babesa ematen egoteagatik".

Otegik eskua luzatu dio lehendakariari

Arnaldo Otegi Sortuko idazkari nagusiak Iñigo Urkullu zoriondu du lehendakariaren kargua zin egin ostean, eta "eskua luzatu" dio "esparru politiko berri bat" eraikitzeko. Horrez gain, prest azaldu da "preso politikorik gabeko herri bat" lortzeko.

Agintari abertzaleak nabarmendu duenez, euskal herritarrentzat Gernika "bakearen eta askatasunaren sinboloa da", eta ekitaldira Urkulluri errespetua adierazteko eta hura zoriontzeko joan direla gaineratu du.

Podemosek "elkarrizketarako irekia" dagoen Gobernua espero dute

Nagua Alba Podemos Euskadiko idazkari nagusiak gaur esan duenaren arabera, "elkarrizketarako irekia" egongo den Eusko Jaurlaritza bat aurkitzea espero du bere alderdiak, baita euskal gizartearen ezaugarri den "aniztasuna" bere egin eta "bertute eta sendotasun" bilaka ditzala ere. Albak baieztatu duenez, Podemoseko taldeak "konstruktiboa den eta euskal gizartearen gehiengoaren eskubideak defendatzen direla bermatzen duen oposizioa egingo du".

Eusko Jaurlaritza berria astelehenean osatuko da

Eusko Jaurlaritza berria datorren astelehenean osatuko da, Jaurlaritzako iturriek jakinarazi dutenez, larunbatean Iñigo Urkulluk lehendakari kargua hartu ostean.

Astelehenean hamaika sailburuen kargu-hartze ekitaldia izango da, eta, ziurrenera, asteartean egingo dute Eusko Jaurlaritza berriaren lehendabiziko gobernu bilera.

Hau zure interesekoa bada, baliteke beste gai hauek ere izatea
Berriak Politika PNV-EAJ Urkullu albisteak Eusko Jaurlaritza Euskal Autonomia Erkidegoa Gernika-Lumo bideoak Gaurko azken orduko albistea Pere Aragonès