Politika -
2017
Jaurlaritzak KPIaren igoera proposatuko du DBE errentarentzat
Halaber, Diru-sarrerak Bermatzeko Errentaren (DBE) inguruko txostena aurkeztuko du Legebiltzarrean, 'eztabaida zehatza' egin dadin.
Agentziak | Erredakzioa
Beatriz Artolazabal Eusko Jaurlaritzako Enplegu eta Gizarte Politika sailburuak Diru-sarrerak Bermatzeko Errenta (DBE) KPIaren arabera igotzea proposatuko duela iragarri du Euskadiko 2017ko aurrekontuetan: "Diru-sarrerak Bermatzeko Errentari KPIaren igoera berbera ezartzea proposatuko dugu, iaz bezala, eta neurriak atzeraeraginezko izaera izango du, 2017ko urtarrilaren 1az gero".
Era berean, Artolazabalek esan du Eusko Jaurlaritzak Diru-sarrera Bermatzeko Errentaren inguruko diagnostikoari buruzko txostena aurkeztuko duela Legebiltzarrean, "alderdi politikoek araudia berrikusteko abiapuntu gisa, gaiaren inguruko eztabaida zehatza egin dezaten".
Enplegu eta Gizarte Politika sailburuaren arabera, beharra duten pertsonei diru-sarrerak bermatzeko sistema izateak "Euskadiko garapen sozial eta ekonomikoari lagunduko dio nabarmen, ahalik eta gizarteratze handiena ahalbidetuko duelako".