Politika -
Estatu Islamikoa
Donostiako ustezko jihadistak gaur deklaratuko du epailearen aurrean
Frantzian atentatua egiteko agindua zuen taldeko burua izatea leporatzen diote atxilotuari.
AGENTZIAK | ERREDAKZIOA
Astelehenean Donostian atxilotutako ustezko jihadistak gaur deklaratuko du epailearen aurrean, epaitegietako iturriek jakinarazi dutenez. Atzerrian kideak erakarri eta, Estatu Islamikoarekin (ISIS) bat egiteko, Siria eta Irakeko gerretara eramateko ardura zuen taldeko burua izatea leporatzen diote atxilotuari.
Jose de la Mata 5. Instrukzio Epaitegiko epaileak gaur hartuko dio deklarazioa ustezko jihadistari. Ustez, atzerrian kideak erakarri eta Turkiara bidaltzen zituen, han Estatu Islamikoaren aginduak jaso, eta, ondoren, Europan ekintza terroristak egiteko.
Boxeo irakaslea zela baliatuta, atxilotua bazterketa arriskuan dauden gazteengana hurbiltzen zen, eta sare sozialak erabiltzen zituen. Gainera, harremanak izan zituen Marokon eta Frantzian lehendik atxilotutako beste bi pertsonarekin.
Poliziaren esanetan, talde horrek Frantzian atentatua egiteko agindua zuen, 2015eko azaroaren 13an Parisen egindakoaren eta 2016ko uztailaren 14an Nizan gertatutakoaren antzekoa.
Ia zortzi orduz atxilotuaren Donostiako etxea miatu ostean, Poliziak lau kaxa atera zituen bertatik. Atxilotua alokairuan bizi zen Donostiako Intxaurrondo auzoko etxebizitza batean.