Politika -

Indarkeria matxista

Ahal Duguk Senatura eraman du Sevillako ultren pankartaren auzia

Ahal Duguko Nafarroako senatariak ekimen bat aurkeztu du, futbol zelaietan indarkeria matxista goratzen den kasuetarako protokoloengatik galdetuz.

Sevillako jarraitzaileek igandean Sadarren jarri zuten pankarta. Argazkia: @F9Osasuna
Sevillako jarraitzaileek igandean Sadarren jarri zuten pankarta. Argazkia: @F9Osasuna

AGENTZIAK | ERREDAKZIOA

Whatsapp Facebook Twitter Telegram Email

Nafarroako Ahal Duguk Espainiako Senatura eraman du Sevilla futbol taldeko jarraitzaile batzuek joan den igandean Sadar futbol zelaian erakutsitako pankartaren auzia. Kartelaren bidez, beraien babesa agertu zioten sanferminetan emakume bat bortxatzea egotzita auzipetuta dauden bost pertsonetako bati.

Andaluziako taldearen jarraitzaileek Osasunaren eta Sevillaren arteko futbol partidan erakutsi zuten pankarta, eta Nafarroako erakundeek, alderdi politikoek eta gizarte kolektiboek irmoki salatu dute.

Gaur goizean Idoia Villanueva Nafarroako Ahal Duguko senatariak ekimen bat aurkeztu du, futbol zelaietan indarkeria matxista goratzen den kasuetarako protokoloengatik galdetuz.

Villanuevak jakinarazi duenez, indarkeria matxista edo genero indarkeria goratzea saihesteko neurri, isun edota jarduera protokoloen berri jasotzeko eskaria egin du.

Halaber, gaur egun dauden tresnak, Indarkeriaren kontrako Batzordea kasu, adierazpen publiko horiei aurre egiteko nahikoak ote diren galdetu du.

Hau zure interesekoa bada, baliteke beste gai hauek ere izatea
Politika Indarkeria matxista Nafarroako albisteak Gaurko azken ordukoa Podemos Ahal Dugu Nafarroa