Politika -

Prentsaurrekoa

Gaixo larri dauden presoak libre uztea aldarrikatu du Sarek

Maiatzaren 6an presoen eskubideen alde Gasteizen antolatutako manifestazioan parte hartzeko deia egin du Sare Herritarrak.

Sare Herritarrak agerraldia egin du Gasteizen. EiTB
Sare Herritarrak agerraldia egin du Gasteizen. EiTB
Sare Herritarrak agerraldia egin du Gasteizen. EiTB

Agentziak | Erredakzioa

Whatsapp Facebook Twitter Telegram Email

Sare Herritarrak gaixo larri dauden presoak aske uztea eta espetxe politika "bizikidetzaren zerbitzura" jartzea aldarrikatu du gaur goizean Gasteizen egindako agerraldian.

Kolektiboa pozik agertu da minbiziz gaixo dagoen Oier Gomez presoaren zigorra eta bere gain zituen hiru euroaginduak bertan behera utzi dituztelako. Frantzian dago preso gasteiztarra, 2011n jendarmeen aurkako tiroketa batengatik kondenatuta.

Sarek nabarmendu duenez, presoen eskubideen alde lan egiten dutenen "presio sozialari eta konpromisoari" esker lortu dute Oier Gomez betetzen ari zen zigorra bertan behera uztea.

Hala eta guztiz ere, gogoratu dute Oier Gomezen "antzeko egoeran" dauden preso gehiago badaudela; hortaz, gaixo larri dauden preso guztiak aske geratu arte borrokan jarraituko dutela berretsi dute.

Espetxe politikak "bizikidetzaren" zerbitzura egon behar duela azpimarratu du kolektiboak, presoei ezartzen zaien dispertsio politika amaitzea eskatzeaz gain. Bestalde, "zigorra erabat bete duten presoak aske uztea" ahalbidetzen duen legedia betetzea defendatu du.

Azkenik, maiatzaren 6an presoen eskubideen alde Gasteizen antolatutako manifestazioan parte hartzeko deia egin du Sare Herritarrak.

Hau zure interesekoa bada, baliteke beste gai hauek ere izatea
Politika Presoak albisteak Albisteak