Terrorismoaren 1.300 euskal biktimekin batuko da Espainiako Gobernua

Espainiako Gobernuak Euskadin terrorismoa jasan duten 1.300 biktima deitzeari ekin dio. Gobernuaren asmoa da zenbait topaketatan parte har dezatela, euren beharrizanak ezagutu eta erakundeetatik erantzuna jaso dezaten.

Lehendabiziko bilerak Bilbon izango dira, maiatzaren amaieran, eta ekaina bitartean luzatuko dira, Barne Ministerioak EFEri baieztatu dionez. EAEko bilerekin bukatu ostean, beste autonomia erkidegoetako biktimekin batzeari ekingo diote.

Barne Ministerioak, orain arte, Bizkaiko biktimei zuzendutako 447 gutun igorri ditu, eta Gipuzkoako 621 eta Arabako 246 kaltetu deitzea aurreikusten du.

Topaketak ateak itxita egingo dira biktimen intimitatea gordetzeko helburuarekin, eta beraietan biktimek euren egoeraren berri eman ahalko diote Gobernuari, baita zein diren beren beharrizanak eta egonezinak ere.

Barne Ministerioak Sonia Ramos Terrorismoaren Biktimei laguntzeko zuzendaria bidaliko du bilera horietara.