Politika -

EAJ-PP ituna

Aurrekontuei buruzko akordioaren gakoak

Espainiako Gobernuak 380 milioi euro bideratuko ditu AHTra, 2023an martxan egon dadin. Horrez gain, Ertzaintzari eta argindar tarifari buruzko adostasunak lortu dituzte.

Bilboko AHTren lurrazpiko sarbidearen lanak 2020an abiatuko dituzte. Irekia
AHTk Bilbon izango duen geltokia. Irekia
4.000 euroko inbertsioetatik hasi eta 25.000 eurotakoetara arte

1:33

EITB.EUS

Whatsapp Facebook Twitter Telegram Email

EAJk Kongresuan dituen bost diputatuen botoei esker, Espainiako Gobernuak 2017rako prestatu duen Estatuko Aurrekontu Orokorren proiektuak aurrera jarraitu ahalko du, osoko zuzenketak baztertuta. Trukean, Rajoyren gobernuak "euskal agendaren" hainbat konpromiso bete beharko ditu. Guztira, 36 puntu dira, baina 10 garrantzitsuenak bildu ditugu segidan:

1. Kupoa

2007-2015 epealdiari dagokion Kupoaren kitapenen inguruan akordioa lortu dute bi aldeek, eta atzerapenak tarteko, 1.400 milioi euro itzuli beharko dizkio Espainiako Gobernuak Jaurlaritzari. Horrez gain, 2017ko behin-behineko Kupo likidoa 956 milioikoa izatea adostu dute.

2. AHT

'Euskal Y'a 2023an martxan egon dadin, beharrezkoak diren inbertsioak egin eta epeak betetzeko konpromisoa hartu du Rajoyren gobernuak. Hala, 3.380 milioi euro bideratuko ditu proiektura. Hitzartutakoaren arabera, Donostiako eta Ezkioko geltokietako lanak 2018an abiatuko dira; Astigarraga-Oiartzun-Lezo tartearenak 2021ean hasiko dira. Bilboko eta Gasteizko lurrazpiko geltokien lanei 2020an ekingo diete, eta Frantziako tren lasterrarekiko (TGV) lotunea 2025erako egongo da prest.

3. Argindar tarifa berria

Euskal enpresei argindar faktura merkatuko zaie 2018tik aurrera, urtean 50 milioi euro aurreztuta. Rajoyren gobernuak 6.1b tarifa kendu, eta 30-36 kilowatt arteko tentsioari dagokiona 6.2 tarifaren baitan sartuko du.

4 eta 5. Jundizeko terminala eta Lezo-Pasaia plataforma

Lezo-Pasaia (Gipuzkoa) plataforma logistikoa eta Jundizeko (Araba) terminal intermodala sustatzeko akordioa lortu dute bi aldeek. Lehenengoarentzat 100 milioiko partida aurreikusi dute, eta bigarrenarentzat, 120 milioi. Arabako terminala 2023an egon beharko litzateke prest, eta gako izango da Bilbo portua eta Forondako aireportua lotzeko. Lezo-Pasaia plataformari dagokionez, Pasaiako Portuaren eta ahalmen handiko errepideen lotunea bultzatuko du.

6. Lemoizeko zentral nuklearraren lurrak

Espainiako Gobernuak euskal erakundeen esku utziko ditu Lemoizeko zentral nuklearraren lurrak, baita eraikita dagoen kai-muturra ere.

7. Ertzaintza

Adostutakoaren arabera, "ahalik eta lasterren" Segurtasun Batzordearen bilera egiteko konpromisoa hartu du PPren gobernuak. Batzarrean ondoko gaiak onartuko dituzte: Ertzaintzak tokia izango du aurrerantzean Antolatutako Krimenaren eta Terrorismoaren Inteligentzia zentroan, eta Europako polizia arteko lankidetza organoetan parte hartuko du. Horrez gain, muga zeharkatu ahalko du jarraitzen dituen susmagarriak atxilotzeko.

8. 18 trenbide pasagune, lur azpian

Arriskutsuak diren 18 trenbide pasagune lurperatuko dituzte. Tartean, Zalla, Gueñes, Ortuella, Bilbo (Zorrotza) Itsasondo, Hernani eta Amurrio herrietakoak.

9. Berroneratzeak eta kartzela berria Gipuzkoan

Zumaiako Santiago hondartza leheneratuko dute eta Basauriko Pozokoetxe auzoan dagoen trenbide zabalgunea herritarren esku uzteko izapideak egingo dituzte.

Horrez gain, Nerbioi garaiko ur zikinak garbitzeko eta arazteko azpiegiturak berritzeko lanen epeak zehaztu dituzte.

Gipuzkoako espetxe berria lehenbailehen egiteko konpromisoa hartu du Espainiak, Martuteneko lurrekin zer egin erabakitzeko.

10. Diru-laguntzak

Hainbat euskal elkarteri Madrilgo gobernuak emandako diru-laguntzak handitzeko edo ematen hasteko konpromisoa hartu du Rajoyk. Tartean dira Euskaltzaindia, Eusko Ikaskuntza, Donostiako Zinemaldia, Aranzadi Zientzia Elkartea, eta Artium eta Bilboko Itsas museoak, besteak beste.

 

Hau zure interesekoa bada, baliteke beste gai hauek ere izatea
Politika EAJ-PNV Alderdi Popularra Bilbo Donostia argazkiak Ertzaintza Kontzertu Ekonomikoa Zer gertatu da Bizkaian? Gaurko albisteak Gipuzkoa Araba EAE Espainiako Gobernua albisteak Espainia albisteak Ekonomia albisteak Gasteiz berriak Gaurko azken orduko albistea