Politika -

SOZIOMETROA

EAJk irabaziko lituzke EAEko hauteskundeak, 29 eserlekurekin

2016an baino eserleku bat gehiago lortuko lukete jeltzaleek. Gainerako alderdiek emaitzak errepikatuko lituzkete, Elkarrekin Podemosek izan ezik, aulki bat galduko bailuke Legebiltzarrean.

Ortuzar eta Urkullu, 2016ko irailaren 25eko hauteskunde gauean.
Ortuzar eta Urkullu, 2016ko irailaren 25eko hauteskunde gauean.
EAJk legebiltzarkide bat gehiago izango luke, Soziometroaren arabera

1:14

EITB.EUS

Whatsapp Facebook Twitter Telegram Email

EAJk berriro irabaziko lituzke Eusko Legebiltzarrerako hauteskundeak, 29 eserlekurekin, egun dituenak baino bat gehiago. Gainerako alderdiek 2016ko irailaren 25ean lortutako emaitzak errepikatuko lituzkete, Elkarrekin Podemosek izan ezik; alderdi moreak ordezkari bat gutxiago eskuratuko luke.

Hauteskunde autonomikoetarako boto-aurreikuspenari buruzko galdeketa egin berri du Eusko Jaurlaritzak, eta, emaitzen arabera, Gasteizko Ganberaren aulkien banaketa ia bere horretan mantenduko litzateke: Elkarrekin Podemosek aulki bat galduko luke, EAJren mesedetan.

Emaitza horiek gehiengo osoa emango liokete EAJk eta PSE-EEk osatzen duten gobernu koalizioari.

Lurralde historikoei erreparatuta ere, emaitzak ez lirateke ia aldatuko. Bizkaian EAJk 13 aulki lortuko lituzke, egun dituenak baino bat gehiago. EH Bildu izango litzateke bigarren indarra, bost eserlekurekin. Lurralde honetan galduko luke Elkarrekin Podemosek ordezkari bat, lau eserleku izatetik hiru izatera pasatuta. Sozialistek ere, hiru ordezkari lortuko lituzkete Bizkaian, eta popularrek, berriz, 2.

Gipuzkoan, 2016ko emaitzak izango lirateke berriro: EAJk 9 eserleku lortuko lituzke; EH Bilduk, 8; Elkarrekin Podemosek eta PSE-EEk, hiruna; eta PPk, 2.

Araban ere, errepikatu egingo lirateke iazko emaitzak: jeltzaleek 8 ordezkari lortuko lituzkete; PPk eta EH Bilduk, bosna; Elkarrekin Podemosek, 4; eta PSE-EEk, 3.

Maiatzaren 16tik 22ra egin zen galdeketa, eta 2.268 pertsona elkarrizketatu zituzten.

Hau zure interesekoa bada, baliteke beste gai hauek ere izatea
Politika albisteak Bizkaiko albisteak Gaurko albisteak Gipuzkoa Araba Eusko Jaurlaritza Eusko Legebiltzarra argazkiak Hauteskundeak Euskadin Alderdi politikoak Eguneko albisteak Albisteak Euskal Autonomia Erkidegoko emaitzak