Politika -

Katalunia

Erreferendumerako diru partidak baliogabetu ditu Auzitegi Konstituzionalak

Kontsulta independentista egiteko diru publikoa erabiltzea Konstituzioaren aurkakoa dela ebatzi du auzitegiak.

Auzitegi Konstituzionala. EiTB
Auzitegi Konstituzionala. EiTB
Auzitegi Konstituzionala. EiTB

AGENTZIAk | ERREDAKZIOA

Whatsapp Facebook Twitter Telegram Email

Auzitegi Konstituzionalak Kataluniako Aurrekontu Legearen 40. xedapena baliogabetu du, aho batez, eta ebatzi du Konstituzioaren aurkakoa dela diru publikoa bideratzea erreferendum independentista egiteko.

Hain zuzen ere, erreferendumaren antolakuntzari buruzkoa da 40. xedapena.

Erabaki honekin, Konstituzionalak onartu egin du Espainiako Gobernuak apirilaren 4an Kataluniako Aurrekontuen aurka jarritako helegitea. Idatzi horrekin, Mariano Rajoyren Exekutiboak 40. xedapenaren eta hainbat diru sailaren aurka egin zuen, erreferendumari buruzkoak denak.

Auzitegiaren epaiak ezarri du Aurrekontuen hainbat atal Konstituzioaren aurkakoak izan litezkeela horien bidez erreferendumari dirua bideratzen badiote.

40. xedapenak zera ezartzen du hitzez hitz: "Generalitateak bermatu egin behar du beharrezkoa den dirua Kataluniako etorkizun politikoari buruzko erreferendum prozesuari aurre egiteko".

Konstituzionalak azaldu duenez, Kataluniako Aurrekontu Legeak ez du dirurik zehazten erreferendumarentzat, eta hainbat ataletan jasotako aipamenak "orokorrak" dira. Nolanahi ere, Aurrekontu Legea interpretatuta, Kataluniako Parlamentuak erreferenduma diruz hornitu behar dela ulertzen dela ebatzi du auzitegiak.

Horren ildotik, "legegilearen koherentzia" dela eta, Ganberak erreferenduma antolatzeko gastuak onartuko dituela nabarmendu du Konstituzionalak.

Hau zure interesekoa bada, baliteke beste gai hauek ere izatea
Katalunia Berriak Politika Kataluniako erreferenduma Espainia bideoak Gaurko azken orduko albistea Espainiako Auzitegi Konstituzionala