Politika -
Katalunia
Rajoy Riverarekin batuko da 155. artikulua nola ezarri behar duen azaltzeko
Espainiako Gobernuak PSOErekin eta Ciudadanosekin adostu nahi ditu eman beharreko pausoak, gehiengo parlamentario zabala izateko. 16:00etan bilduko da Ciudadanoseko buruarekin.
Agentziak | Erredakzioa
Albert Rivera Ciudadanos alderdiko buruzagia Moncloara joango da arratsaldean, 16:00etan, Mariano Rajoy Espainiako presidentearekin biltzera. Kataluniako auzia izango dute mahai gainean, Espainiako Konstituzioaren 155. artikulua ezartzeko pausoak zehazte aldera.
Bihar 10:00etan bukatuko da Gobernu zentralak Puigdemonti urriaren 10ean independentzia aldarrikatu ote zuen argitzeko bidalitako errekerimenduari erantzuteko epea. Horren bezperan bilduko dira, beraz, bi buruzagiak.
Espainiako Gobernuaren kontrolerako saioa izan da goizean Kongresuan, eta saioa amaitutakoan, elkarrekin biltzeko hitzordua proposatu dio Rajoyk Riverari, mezu bidez. Horrela azaldu du Ciudadanoseko buruak berak prentsaurrekoan.
Soraya Saenz Santamaria Espainiako presidenteordeak bilkuran aurreratu duenez, 155. artikuluari bidea eman baino lehen PSOErekin eta Ciudadanosekin hitz egiteko asmoa zuen Rajoyren exekutiboak, gehiengo parlamentario zabala izateko asmoz.
Riveraren iritzian, Kataluniako auzia konpontzeko modurik onena 155. artikulua aplikatzea da, gerora hauteskunde autonomiko "libre eta garbiak" egiteko. Horren ildoan, sozialisten "iritzi aldaketa" txalotu du —artikulua aplikatzearen alde dago orain PSOE—.
