Politika -

Katalunia

Urtarrilean Katalunian hauteskundeak deitzea adostu dute PSOEk eta Rajoyk

Esquadra Mossoen eta TV3 telebista publikoaren kontrola bere gain hartzea ere adostu omen dute PPk eta PSOEk.

Bi buruzagiek Moncloan egindako bilera. Artxiboko argazkia: EFE
Mariano Rajoy eta Pedro Sanchez. EFE
PSOEk eta Rajoyk urtarrilean Katalunian hauteskundeak deitzea adostu dute

1:25

Agentziak | Erredakzioa

Whatsapp Facebook Twitter Telegram Email

Urtarrilean Katalunian hauteskunde autonomikoak deitzea adostu dute Mariano Rajoyren Gobernuak eta PSOEk, Carmen Calvo sozialisten Berdintasun idazkariak TVEri baieztatu dionez.

Espainiako telebista publikoak bere webgunean zabaldu duenez, diario.es egunkari digitalak gaur aurreratu duena egia den galdetu diote elkarrizketa batean Calvori, eta "bai" erantzun du berak.

PSOEk Konstituzioaren 155. artikulua ezartzeko prozesua negoziatzeko izendatutako ordezkaritzaren kide da Calvo.

Horren esanetan, "Pedro Sanchez PSOEko idazkari nagusiak oso argi izan du hasieratik bertatik Konstituzioaren 155. artikulua Katalunian hauteskundeak egiteko ezarriko dela".

"Primeran legoke Puigdemont jaunak, egoera berriro hausnartuta, berak deituko balitu hauteskundeak", erantsi du buruzagi sozialistak.

Espainiako Gobernuak martxan jar litzakeen neurriek baliteke Esquadra Mossoei eta TV3 telebista kateari eragitea, Carmen Calvo PSOEren Berdintasun idazkariak onartu duenez.

"Argi dago baietz", erantzun du Calvok Antena 3en egin dioten elkarrizketa batean, neurrietako batzuek horrelako ondorioak izan ote ditzaketen galdetu ostean.

Rajoyk ez du ezer baieztatu

Bitartean, Mariano Rajoyk uko egin dio Alderdi Sozialistarekin eta Ciudadanosekin egin duen akordioaren xehetasunak azaltzeari.

Hortaz, Espainiako Gobernuko presidenteak ez ditu baieztatu Carmen Calvo PSOEko Berdintasun idazkariak iragarritako neurriak: Kataluniako hauteskundeak urtarrilera aurreratzea eta Esquadra Mossoen eta TV3 telebista publikoaren kontrola bere gain hartzea.

"Hartu beharreko neurri guztiak bihar jakinaraziko ditugu", azpimarratu du Rajoyk.

 

 

Hau zure interesekoa bada, baliteke beste gai hauek ere izatea
Katalunia Politika albisteak PSOE Alderdi Popularra Rajoy albisteak Espainiako Gobernua Espainia albisteak Pedro Sánchez argazkiak Gaurko azken ordukoa Kataluniako Hauteskundeak gaur