Politika -

Kongresua

Martuteneko kartzela ixteko bidea erraztuko dutela hitz eman du Zoidok

Zubietako espetxe berria egiterako, zaharra ixteko aukera dagoela esan du ministroak. Martuteneko kartzelaren egoera 'oso txarra' dela onartu du.

Juan Ignacio Zoido Barne ministroa, gaur, Kongresuan. Argazkia: EFE.
Juan Ignacio Zoido. Argazkia: EFE.
Juan Ignacio Zoido Barne ministroa, gaur, Kongresuan. Argazkia: EFE.

Agentziak | Erredakzioa

Whatsapp Facebook Twitter Telegram Email

Martuteneko espetxea ixteko erabakia Zubietako kartzela berria eraiki aurretik etor litekeela aurreratu du gaur Juan Ignacio Zoido Espainiako Barne ministroak. Horren hitzetan, Espainiako Gobernuak "bidea erraztuko" du, Donostian dagoen espetxea ixteko eta, horrela, lur-sailak "liberatzeko". Zoidok esan duenez, datozen egunotan bilduko da Eneko Goia Donostiako alkatearekin Martuteneri buruz hitz egiteko.

"Egoera argitzeko unea da, beharrezkoa da", adierazi du ministroak, Mikel Legarda EAJko diputatuak gaur Kongresuan egindako galdera bati erantzunez.

Zubietako espetxe berriaren proiektua abian dela esan du Zoidok, eta kartzela eraikiko den lekuan ezponda egiteko kontratua duela gutxi lizitatu dela jakinarazi du. Gipuzkoako espetxe berria egiterako, zaharra ixteko aukera dagoela esan du.

Martuteneko kartzelaren egoera "oso txarra" dela onartu du ministroak. 2005ean abiatu zituzten espetxe berria egiteko elkarrizketak.

Legarda diputatuak ere Donostiako presondegiaren baldintza eskasak nabarmendu ditu; ez presoek, ez eta bertako langileek ezin dutela baldintza horietan egon adierazi du. Lehenbailehen ixtea premiazkoa dela gaineratu du, auzoa zabaltzeko eta berritzeko.

Halaber, espetxeetako eskumena Eusko Jaurlaritzaren esku utz dezatela eskatu du gaurko saioan diputatu jeltzaleak. Zoidok ez du gai horretaz hitz egin.

Hau zure interesekoa bada, baliteke beste gai hauek ere izatea
Diputatuen Kongresua albisteak Berriak Politika Donostiako informazioa Albisteak Gaur Albisteak