Politika -

Katalunia

Puigdemont: 'Espainiak barregarri ez geratzearren baliogabetu du euroagindua'

Presidentearen hitzetan, euren kontra emandako agindua "lardaskeria" izan da, eta agerian utzi du Belgikara joatearen erabakia 'estrategia egokia' izan zela.

Puigdemont, agerraldian. EFE
Carles Puigdemont. EFE
Puigdemont: 'Barregarri geratzeak beldurra eman dio espainiar Estatuari'

Agentziak | Erredakzioa

Whatsapp Facebook Twitter Telegram Email

Carles Puigdemont presidenteak nabarmendu duenez, "beldurrez" eta "barregarri ez geratzeagatik" baliogabetu du Auzitegi Gorenak beraren eta lau kontseilari kargugabetuen aurkako euroagindua. Presidentearen aburuz, Auzitegi Nazionalak emandako bilatzeko eta atxilotzeko agindu europarra "lardaskeria hutsa" izan da, eta horrek "agerian utzi du auzi politiko baten aurrean gaudela".

Puigdemontek eta berarekin batera Bruselan diren lau kontseilari kargugabetuek agerraldia eskaini dute gaur Bruselan, Auzitegi Gorenak euren kontrako euroaginduak bertan behera utzi eta biharamunean.

Presidentearekin batera, Lluis Puig, Toni Comin, Meritxell Serret eta Clara Ponsati kontseilari kargugabetuak izan dira prentsaurrekoan .

"Agindua eman eta 30 egunera, barregarri geratzeko beldurra izan du Espainiako Estatuak, galtzeko beldurra", esan du Junts per Catalunya alderdiko zerrendaburua ere badenak.

Horren hitzetan, Belgikara joateak auziaren "fokua nazioartean" jartzea eta "askatasunez defendatzea" ahalbideratu zuen, eta Gorenaren erabakiak erakutsi du "estrategia egokia, baliagarria izan zela".

"Belgika ez da ausartu euroagindua gauzatzera, jakin badakielako ez dela onargarria ezta Europako arauen araberakoa ere", azpimarratu du. Europaren bihotzean "espetxean diren gure kideek izan ez duten errespetua eta duintasuna" izan dutela erantsi du.

Ildo beretik mintzatu da Toni Comin ere, kargugabetutako kontseilarietako bat: "Gaur agerian geratu da Belgikara etorri ginen eguna ona izan zela guretzat, eta txarra Espainiako Gobernuarentzat eta bere jarraitzaileentzat".

Hauteskundeen ostean itzultzea hausnartzen ari da

Kataluniara itzultzeko asmorik ote duen galdetuta, presidenteak argitu du abenduaren 21eko hauteskundeen ondoren bueltatzea hausnartzen ari dela diputatu akta jasotzera, baina "erabakia hartu baino lehen ondo pentsatu" behar duela azpimarratu du.

"Aukeratuak garenok diputatuak izango gara eta kargua hartuko dugu, hauteslekuetan irabazi dugulako", esan du.

Urriaren 30etik daude Puigdemont eta bere kontseilariak Belgikako hiriburuan.

 

Hau zure interesekoa bada, baliteke beste gai hauek ere izatea
Kataluniako azken ordukoa Politika albisteak Bruselako albisteak gaur Kataluniako erreferenduma gaur Auzitegi Gorena albisteak Belgika Alderdi politikoak Albisteak Kataluniako Hauteskundeak gaur Pere Aragonès argazkiak