Politika -

Torturari buruzko txostena

EH Bildu: 'Tortura metodo homologatua izan da, erabaki politiko baten fruitua'

EAEn 1960 eta 2014. urteen artean izandako tortura kasuei buruzko txostena argitara atera ostean, erreakzio oldea etorri da. Elkarrekin Podemosek txalotu egin du; PSE-EEk eta PPk, ez.

Julen Arzuaga, EH Bilduko legebiltzarkidea. Artxiboko argazkia: EFE
Julen Arzuaga, EH Bilduko legebiltzarkidea. Artxiboko argazkia: EFE
Julen Arzuaga: 'Torturen inguruko txostena kritikatzea lotsagarria da'

AGENTZIAK | ERREDAKZIOA

Whatsapp Facebook Twitter Telegram Email

Euskal Autonomia Erkidegoan 1960 eta 2014. urteen artean izandako tortura kasuei buruzko txostena argitara atera eta biharamunean, erreakzio oldea etorri da. Guztira, 1960 eta 2014. urteen artean gutxienez 4.113 tortura kasu izan direla egiaztatu du Eusko Jaurlaritzak agindutako txostenak. EH Bilduk eta Elkarrekin Podemosek txostena txalotu dute; PSE-EEk eta PPk, ez.

Julen Arzuaga EH Bilduko legebiltzarkideak ziurtatu duenez, txostenak "ofizialtasun eztabaidaezina" ematen die torturei, "erabaki politiko" baten fruitu izan den eta Auzitegi Nazionalak "homologatu" den metodoari.

4.113 tortura kasu horiek "egiaztatu" izanaren garrantzia azpimarratu du Arzuagak, eta orain biktimak aitortzeko eta erreparazioa emateko "mekanismo eraginkorrak" abiatu behar direla gaineratu du.

Halaber, PSE-EEren jarrera "lotsagarria eta deitoragarria" dela salatu du, horren esanetan, ez dituelako giza eskubideen urraketa guztiak onartu nahi.

Elkarrekin Podemosen izenean, Iñigo Martinezek txalotu egin du torturari buruzko txostena eta kritikatu egin du PSE-EEren jarrera. Martinenezek PSE-EEri ohartarazi dionez, abusu horiek aitortzeak "ez du gatazkaren teoria hauspotzen", ezta ETAren indarkeria justifikatzen ere. Gainera, EH Bilduri ere mintzatu zaio, eta abusu horien egiaztatzea "bi aldeen arteko gatazka armatuari buruzko kontaketa faltsua" egiteko ez erabiltzea eskatu dio.

Iñigo Martinezek azaldu duenez, koalizio morea Euskal Autonomia Erkidegoan eta Estatu espainiarrean izandako "giza eskubideen urraketa" guztiak aitortzen dituzten txosten guztien alde dago.

Ildo horretan, ikerketa horiek egia eta biktimen erreparazioan laguntzeko balio behar du, baita torturatu dutenen kontrako auzibide judizialen bide emateko ere.

PSE-EEk ohar batean zabaldutakoaren arabera, ez dago ados ez mamiarekin ezta eman zaion formarekin ere. Hori dela eta, PSE-EEk ez ditu txostenak aurkezten dituen proposamenak babestuko.

"Gure ustez, akatsa da ETAren mende erdiko ibilbidea 840 hildako eta 3.400 torturatu izan direla esatera laburbiltzea"; izan ere, "torturaren praktika orokorra izan den ideia faltsua ematen da horrela", sozialisten iritzian. Horren aurrean, Zuzenbide Estatuaren aurrean Poliziak eta botere judizialak egindako lana goraipatu du.

PSE-EEren iritziz, torturaren erreparazioa 2016ko motibazio politikoko biktimen legearen baitan egin behar da, eta, beraz, ez du torturak prebenitzeko lege baten beharrik ikusten.

Gatazkaren estrategia babestea leporatu dio Carmelo Barrio PPko legebiltzarkideak Eusko Jaurlaritzari, torturari buruzko txostena egitea agintzeagatik. Aldi berean, indar polizialen irudia "zikintzen" duela salatu du.

Kazetarien aurrean egindako agerraldian, torturei buruzko txostenak "gatazkaren teoria" babestu, eta EH Bilduren "erosotasuna" bilatzen duela salatu du Barriok.

Barrioren hitzetan, txostenak "ez du oreka juridikorik", judizialki edo polizialki oinarritu gabeko "lekukotzen kontaketa bat" dela iritzita.

Hau zure interesekoa bada, baliteke beste gai hauek ere izatea
Berriak Politika Eusko Jaurlaritza berriak EAE Alderdi politikoak albisteak EH Bildu Gipuzkoa Gaurko azken ordukoa Podemos Ahal Dugu Euskadi