Politika -

'Altsasu auzia'

Koxka tabernako jabeak eta zerbitzariak ez zuten liskarrik ikusi

Tabernako jabeak adierazi duenez, atestatuan jasotako adierazpen batzuk ez dira berak esanak.

Lekuko gisa deklaratu duen Koxka tabernako zerbitzaria.
Lekuko gisa deklaratu duen Koxka tabernako zerbitzaria.
Koxka tabernako jabeak eta zerbitzariak ez zuten liskarrik ikusi tabernan

1:56

EITB.EUS

Whatsapp Facebook Twitter Telegram Email

Koxka tabernako zerbitzarietako batek Auzitegi Nazionalean Altsasu auziko epaiketan gaur esan duenez, liskarra gertatu zen gauean "giroa ez zegoen gaiztotuta", berak ez zuen "liskarrik ikusi, edo ezer arrarorik sumatu". "Ziur nago horretaz", erantsi du.

Saioa 10:00etan hasi da. Epaiketaren hirugarren saioa da, eta horretan gau hartan aritu ziren Foruzaingoko agenteek eta Koxka tabernako jabeak eta zerbitzariak euren testigantzak eskainiko dituzte. Astelehenean hasi zen epaiketa, zortzi akusatuen deklarazioarekin (bertsio ofiziala ukatu zuten), eta asteartean guardia zibilek eta euren bikotekideek deklaratu zuten.

Naiara Koxka tabernako zerbitzarietako bat, gau hartan lanean egon zenetako bat, izan da deklaratzen lehena. Azaldu duenez, gau hartan "giroa ez zegoen gaiztotuta" eta berak ez zuen "liskarrik" ikusi. Bere nagusiak, Koxka tabernako jabeak, eman zion borrokaren berri.

Lekuko normal gisa egindako deklarazioan, zerbitzariak kontatu du Koxka taberna ez dela oso handia, eta gauez argiak itzalita egoten direla, "afariak amaitzen direnetik, 00:30-01:00ak aldera". Zerbitzariaren hitzetan, gau hura "arraroa" izan zen, lokala ez baitzen guztiz bete; horregatik, ez zen harritu taberna erabat hustu zenean.

Nabarmendu duenez, barratik taberna guztia ikus dezake, baita atearen ingurua ere, "argia duen leku bakarra" delako. Horren hitzetan, lokalak duen ate bikoitzeko tartean —lau bat metro koadroko eremua— gehienez 10 pertsona sartzen dira, "oso estu".

Tabernako jabearen deklarazioa

Zerbitzariaren ostetik, Josu Muñoa Koxka tabernako ugazabak hitz egin du, horrek ere lekuko normal gisa. Argitu duenez, ostiral gau hartan ez zuen lan egin, eta tabernara kutxako dirua jasotzera joan zen. Ez zuen liskarrik ikusi, eta gertatutakoaren berri tabernatik ateratzean izan zuen, etxera zihoala: "Irten nintzenean tenientea ikusi nuen espaloian etzanda. Maria Jose bere bikoteak putasemea deitu ninduen. Tenienteari altxatzen lagundu nion, baina hankan min zuela esan zidan, eta ezin zuela. Nire jaka jarri nion gainetik. Larrialdietara deitu behar ote nuen galdetu nien, baina jakinaren gainean zeudela esan zidaten".

Horren ostean, esan duenez, tabernara sartu zen berriro eta Naiara zerbitzariari kontatu zion jazotakoa.

KOXKA JABEA alsasua

Muñoa, bere deklarazioaren une batean.

Fiskalak egindako galderei erantzunez, Muñoak esan du igandeak deklaratu zuela berak Foruzaingoaren aurrean, eta ez astelehenean, Ministerio Publikoak dioen moduan. Atestatuan jasotako bere adierazpen batzuk berak egindakoak ez direla azpimarratu du tabernariak (erasotzaileek "jotzen zekitela" edota erasoa aurrez prestatua zela).

Urriaren 15 hartatik, tabernan pintaketak eta mehatxuzko telefono deiak jaso dituela aitortu du Koxka tabernako jabeak: "'Cara al sol' kantatzen deitu didate", azaldu du.

Akusatuetako baten bat tabernan ikusi ote zuen galdetuta, Jokin Unamuno eta Oihan Arnanz Koxkan ikusi zituela onartu du; Ainara Urkijo ere ikusi zuen, baina ez bere tabernan. Ez zuen Adur Ramirez de Alda eta Iñaki Abad ikusi, ez Koxkan, ez kalean.

Foruzainen deklarazioa

Ondoren, hasiera batean bertaratu ziren bi foruzainek deklaratu dute, baita geroago hurbildu ziren istiluetarako agenteek ere. Era berean, argiketak eta eginbideak bideratzeko ardura izan zuten foruzainek euren bertsioa eman dute.

Koxka tabernako inguruetara joan ziren lehen bi foruzainek ziurtatu dutenez, bertaratu zirenean tenientea lurrean etzanda topatu zuten “zorabiaturik, hankan mina zuela eta konortea erdi galduta”, eta sarjentua eta haien bikotekideak “negarrez eta nahiko urduri”. Foruzainaren ahotan, tokian 40 bat lagun zeuden, eta “tentsio handia” zen. Zenbait pertsona (“dozenaka”, baten arabera eta “bat edo bi”, bestearen esanetan) mugikorrarekin grabatzen ari ziren.

Azaldu dutenez, “sarjentuak jendea seinalatzen zigun, esanaz: ‘honek eraso egin dit, eta horrek eta beste horrek…’ Norbait identifikatzea oso zaila zen, ondorioz, hazpegi nabarienak zituztenak atxiki genituen: bat bizarra eta txano batekin –Jokin Unamuno- eta beste bat elastiko more-arrosa batekin”.

Pertsona taldeak guardia zibilak zirela bazekiela onartu du foruzain batek, Guardia Zibilari laguntzea aurpegiratu zietelako. Gainera, sarjentua zergatik ez zuten atxilotzen galdetu zieten. Zehaztu duenez, guardia zibila eta haien bikotekideak kenduta, inor ez zen kolpeak salatzera gerturatu. “Jipoi bat izan zen, eta kito”, adierazi du.

Biek jakitera eman dutenez, halako batean, Jokin Unamuno autoan atxiloturik zutenean, inguruko jendeak atxilotua ibilgailutik atera zuen, eta “berriz sartzea asko” kostatu zitzaien.

Bestalde, Oihan Arnanz ukabila itxita eta jarrera oldarkorrarekin hurbildu zitzaiela azaldu dute, baina aurre egin eta “desagertu” zen. Fisikoa arriskuan ikusi zutela onartu dute bi foruzainek.

Bitartean, ikerketaren foruzain instruktoreak egindako txostena berretsi du. Erasoa biktimak guardia zibilak zirelako gertatu zela adierazi du: “Zalantzarik gabe”.

Gainera, biktimak Koxka tabernara sartu zirenetik erasoa gertatu zen arte, Unamunoren eta Adur Ramirezen arteko telefono deiak izan zirela baieztatu du instruktoreak. Horrela, aldez aurretik pentsatutako eraso bat izan zela frogatu nahi dute.

Istiluetarako foruzain batek baieztatu duenez, askok gertatutakoa mugikorrekin grabatu zuten. Erasoa gertatu eta 20 minutu geroago bertaratu zen. Mozkor, “nahiko oldarkor eta esan txarreko” zeudela erantsi du.

Zehaztu duenez, nahiz eta galdetu, inork ez zion gertatutakoa azaldu, ezta tenientea edo sarjentua akusatu ere: “Inork ez zidan ekarpenik egin”. Aldi berean heldu zen Guardia Zibilak ez zuen esku hartu behar izan, ez tabernaren kanpoaldean, ezta ondoren polizia-etxean ere, non jendeak atxilotuei babesa eman zien, nabarmendu duenez.

 

Hau zure interesekoa bada, baliteke beste gai hauek ere izatea
Auzitegi Nazionala Politika Nafarroa Epaiketak Gaurko titularrak Albisteak Altsasu Gazteak albisteak