Teknologia -
Lurreko telebista digitala
Egokitu duzu antena? Gaur itzaliko dituzte LTDko frekuentzia zaharrak
Antena egokitu ez dutenek edo telebistak berriz sintonizatu ez dituztenek ezingo dituzte LTDko kateak ikusi.
Agentziak | Erredakzioa
Gaur itzaliko dituzte dibidendu digitalaren frekuentzian dauden lurreko telebista digitalaren (LTD) kateak. Hori dela eta, antena egokitu ez dutenek edota telebistak berriz sintonizatu ez dituztenek ezin izango dituzte horiek ikusi.
Urriaren 26tik, telebista kate guztiak bi frekuentziatan emititu dituzte, zaharrean eta berrian. Gaur, frekuentzia zaharrak ezabatuko dituzte, 4G sakelako telefonoetako banda zabalari lekua uzteko, eta, telebista kateak frekuentzia berrien bidez ikusteko, telebista berriz sintonizatu beharra dago. Hainbat kasutan, gainera, antena ere egokitu behar da.
Hasiera batean, Espainiako Gobernuak aurtengo urtarrilaren 1a arteko epea eman zuen telebistak sintonizatzeko, baina ondoren beste hiru hilabete luzatu zuen hura, herritar askok prozesua egin barik zutelako.
Telebista Komertzial Irekien Batasunak (UTECA) zehaztu duenez, 10.000 etxek ez dituzte egin aipatutako egokitzapenak Espainiako Estatuan. Ondorioz, "50.000 eta 100.000 pertsona artean" hainbat telebista kate ikusi gabe geratuko dira. Kasu gehienetan, bigarren etxebizitzak, pertsona edadetuenak edo arazo ekonomikoak dituzten komunitateak geratuko dira telebista kate horiek ikusi gabe.
Gastu horiei aurre egiteko, Espainiako Gobernuak diru-laguntzak emango ditu ekainaren 30a arte.
