Espainiako politikarien % 50, Interneteko 'erabilera txarren' biktima

Espainiako lider politikoen % 50ek eduki kaltegarriak pairatzen dituzte Interneten: profil faltsuak Facebooken, memeak Whatsappen, hautagai politikoen iragana azaleratzen duten foroak, euren gabeziak erakusten dituzten bideoak... Ekainaren 26an izango diren hauteskundeak direla eta, hautagai politikoen aurkako iruzkin negatiboak eta adierazpen iraingarriak areagotu egin dira.

Nortasun Politikoa aholkularitza espezializatuak talde politikoak erreputazioaren aurkako erasoengandik babestea du helburu. Argitaratu dituen datuen arabera, “bi politikarietatik batek” Googleko TOP 10ean indexatutako eduki kaltegarri bat sufritzen du gutxienez.

Analisten esanetan, Informazioaren Gizartean hazten ari den arazoa eta egun Espainian dagoen sumin politikoaren ondorioz eragindako kezka da. Adibide gisa azaldu dute Youtubeko hainbat bideok Rajoyk ingelesarekin dituen zailtasunak agerrarazi dute. Beste eduki batzuetan, hautagaien iragana eta bizitza pertsonalari lotutako alderdiak azaleratu dira. Halaber, Whatsappeko memeak, argazki-muntaiak eta gabezi kulturalak, akademikoak zein pertsonalak erakusten dituzten bideoak ere badira sarean.

Aurrekariak Espainian

Espainian aurrekariak 1986an hasi ziren PSOEk dobermanaren bideoa argitaratu zuenean. Harrez geroztik alderdi politikoek aurkari politikoen alderdi negatiboenak biltzen dituzten bideoak zabaldu dituzte: lapsusak, estropezuak, adierazpen desegokiak eta bidegabeko ekintzei lotutako ustezko harremanak.

Francisco Canals Nortasun Politikoa aholkularitzako zuzendariaren aburuz, fenomeno hau hauteskunde kanpainaurrean eta kanpainan areagotzen da. Aholkularitzari jarraiki, politikariek eduki horiek larritasunez bizi dituzte eta ez dute horietaz jendaurrean hitz egiten.

Espainian sareko jokabide desegokien aurka espezializatutako enpresak ugaritu egin dira. Interneteko sareak eta hornitzaileak eduki kaltegarriak ezabatzeko bitartekari gisa jardutea da euren zeregina. Beste kasu batzuetan, faltsututako profilei baja ematen diete edo ohorearen kontrako delituak argitaratu diren webguneei bazkidetza kentzen diete.