Teknologia -

Euskal informatikaren jaia

Euskal Encounterra, inoizko handiena

Uztailaren 22tik 25ra, antolatzaileek BECn paratutako 4.608 eserlekuak  iaz baino 500 gehiago - beteko dituzte milaka informatika zaleek. Lau egunetarako sarrerak agortuta daude.

Iazko Encounterra oso arrakastatsua izan zen. Argazkia: Euskal Encounter
2015eko Euskal Encounterra
Iazko Encounterra oso arrakastatsua izan zen. Argazkia: Euskal Encounter

EITB.EUS

Whatsapp Facebook Twitter Telegram Email

Aurtengo Euskal Encounterra inoizko handiena izango da. Uztailaren 22tik 25era ospatuko dute informatikaren euskal party-a, eta antolatzaileek inoiz baino ordenagailu postu gehiago paratuko dituzte BECen: 4.608, iaz baino 512 eserleku gehiago.

Euskaltel Konekta Fundazioak antolatuta eta SPRIk babestutako hitzordua Estatuan egiten den informatika eta bideo-joko zaleen bilkura handi eta zaharrena da.

Urtero-urtero gora doa Encounterraren parte hartzaile kopurua. Hori dela eta, aurten ordenagailu postu gehiago (512) jarri dituzte eskura antolatzaileek. Hori horrela izanik ere, lau egunetarako sarrerak arin batean agortu dira, bost minutu eskasean. Iaz sei minututan amaitu ziren.

Ordenagailu-festaren 24. edizio honek elkarren artean konektatutako ordenagailu-sare erraldoia izango du, 35.000 metro koadroko azaleran. Lau egunetan zehar, etenik gabeko jarduera izango da, software librea, hardwarea, sormen digitala eta bideo-jokoak ardatz dituzten dozenaka ekintza eta lehiaketarekin. Euskal Encounterrean konexio-abiadura segundoko 40 giga simetrikokoa izango da (datuen igoerarako 40 giga eta jaitsierarako beste 40). Abiadura horri esker, "munduko informatika-topaketa azkarrenetarikoa" bilakatu da Euskal Encounter, Euskalteleko iturriek nabarmendu dutenez.

Opengunea, ordenagailuen eremuan bertan

Berrikuntza gisa, Opengunea, doakoa eta publikoari irekia den gunea, ordenagailuen eremuan bertan kokatuko da. Hala, elkarrekintza sustatuko da parte hartzaileen eta stand, hitzaldi zein tailerretara gerturatzen diren bisitarien artean. Opengunean 30 formakuntza-saio baino gehiago eskainiko dituzte, gai anitzen inguruan: programazioa, diseinu digitala, sare sozialak, robotika eta bideo-jokoak, besteak beste. Gainera, Euskal Encounter barrutik ezagutu eta parte-hartzaileei erreserbatutako lehiaketetan parte hartu nahi dutenek, topaketan bertan salgai jarriko diren eguneko sarrerak eskuratu ahal izango dituzte.

Encounterraren antolatzaileek azpimarratu dutenez, BECeko hitzorduak "hainbat sektoretako profesional eta zaleen arteko hartu-emana bultzatzeko apustua egiten du, talentu teknologikoak suspertu eta negozio ideia berriei bidea emateko".

 

Hau zure interesekoa bada, baliteke beste gai hauek ere izatea
Teknologia Bilboko azken albisteak Bizkaiko albisteak Barakaldo Euskal Autonomia Erkidegoa albisteak BEC argazkiak Euskaltel Eguneko albisteak Euskal Encounter Bilbon Gipuzkoa Encounter