Teknologia -
Martxoak 14
Matematikazaleok, ospatu gaurkoa: Pi zenbakiaren eguna da!
AEBko Kongresuak 2009an ezarri zuen martxoaren 14a Pi zenbakiaren nazioarteko egun gisa. Matematikarientzat ospakizun eguna da gaurkoa, sare sozialak horren lekuko.
EiTB.EUS
3,14159 edo Pi zenbakia. Gezurra badirudi ere, zenbaki honek ere badu bere eguna: martxoaren 14a. Matematika maite duen orok ospakizunerako eguna du gaurkoa, eta asko dira horren kontura antolatutako ekitaldiak eta lehiaketak. Jai berezi honetara batu dira, beraz, irakasle, ikasle, 'geek' eta matematikariak, eta sare sozialetan ere ozena da ospakizunaren harrabotsa.
Larry Shaw fisikari estatubatuarrak proposatu zuen Pi zenbakiaren omenezko eguna ezartzea. Izendapen ofiziala AEBko Kongresuak egin zuen, 2009an. Eta zergatik aukeratu zuen martxoaren 14a? Bada ingelesez gaurko data 3/14 idazten delako, alegia, Pi zenbakiaren lehen hiru digituak. Halako egun batez jaio zen, gainera, Albert Einstein bera ere.
AEBko eskoletan zientzia zehatzak bultzatzeko ekimenak antolatzeko baliatzen dute Pi zenbakiaren eguna. Matematika bultzatzeko xedea duten erakunde eta taldeek lehiaketak egin ohi dituzte. Aurten, "Altxa zaitez teknologiaren alde" lelopean, euren "egun maitea" aldarrikapenerako erabiliko dute Silicon Valleyko teknologia enpresek. Hala, Google, Facebook eta Apple konpainietako langileek protesta egingo dute eguerdian (01:59an, Pi zenbakiaren laugarren, bosgarren eta seigarren digituekin bat eginez) Donald Trumpen migrazio neurrien kontra.
Espainiako Estatuan lehen aldiz, Matematikaren Errege Sozietateak (RSME, gaztelerazko sigletan) bat egin du egunarekin eta lehiaketa antolatu du ("Sin Pi no soy nada") eskola-umeen artean. Gaur banatuko dituzte sariak, Sevillan. Irabazleetako baten bideoa duzue segidan. Lucas Fos Lehen Hezkuntzako 5. mailako ikasleak oinekin kalkulatu du Pi zenbakia.
Sare sozialetan ere arrakasta izan du Pi zenbakiaren egunak. #PiDay etiketak goiz osoa darama Twitterren 10 gai aipatuenen artean:
Instagramen irudiak du indarra, eta milaka dira Pi zenbakiaren aitzakiatan pastela (ingelesez pie esaten zaio, eta fonetikoki zenbaki matematikoaren antz handia duen hitza da) edo pizza egin dutenak: