Korrikaren urteurren festa egingo dute otsailaren 11n, Irunen

1980ko martxoaren 29an abiatu zen aurreneko Korrika, eta, 37 urte geroago, martxoaren 30ean emango ditu lehen urratsak euskararen aldeko lasterketaren 20. edizioak.

Urtemuga seinalatua izango da, beraz, aurtengoa. Horregatik, 20. urteurrena ospatze aldera, AEK-k festa berezia egingo du otsailaren 11n, Irungo Ficoban. Han, Korrika "sortzeko" ideia zoro bezain zoragarria izan zutenak omenduko dituzte. Era berean, ekimen honetan parte hartzen duten hainbat lagun bilduko dira bertan, jai-giroa nagusi izango duen urteurreneko festan.

Mahai-inguru batetik jaiotako ideia da Korrika. Bilera asko egin ostean, azkenik, bazkari batean hartu zuen itxura gaur egun ezagutzen dugun lasterketak. Horregatik, Irungo omenaldiaren ardatza bazkari bat izatea erabaki dute antolatzaileek; ezustekoz beteta egongo den otordu berezia izango da.

Esan bezala, Ficoba erakustazoka izango da horren lekuko, 13:00etatik 19:30era arte, eta Korrikaren historia goitik behera errepasatuko dute bertan.

Sarrerak 20 euroan daude salgai Korrikaren webgune ofizialean.