Dj gazteek leku garrantzitsua beteko dute Donostiako Aste Nagusian

Abuztuaren 13tik 20ra ospatuko dute aurten donostiarrek Aste Nagusia. Egun horietan Gipuzkoako hiriburuan jai-giroa izango da nagusi, eta, ohi bezala, kontzertuek leku garrantzitsua beteko dute.

Aipatzekoa da, halaber, Donostiako disko-jartzaileen lana sustatze aldera, Kursaaleko terrazetan dj erakustaldiak egongo direla. Bertan, 16 eta 25 urte bitarteko gazteek hartuko dute parte, bakarka zein talde-lanean.

Bestalde, Saguesen talde ezagunen zuzenekoak izango dira egunero. Lehenengo egunean, adibidez, Efecto Pasillo aterako da agertokira, eta bigarrenean, Ken Zazpi. Abuztuaren 15erako, berriz, Fangoriaren emanaldia iragarri dute. Hurrengo egunean Sweet Californiak hartuko dio lekukoa Alaskaren taldeari. Bukatzeko, nabarmentzeko modukoa da Celtas Cortosek eta Antonio Orozcok ez ezik, Michael Jacksonen omenezko musikalak ere hartuko duela lekua aipatu gunean.

Kontzertu guztiak

Abuztuak 13, larunbata, Efecto Pasillo

Abuztuak 14, igandea, Ken Zazpi

Abuztuak 15, astelehena, Fangoria

Abuztuak 16, asteartea, Sweet California

Abuztuak 17, asteazkena, Celtas Cortos eta Irun Hiria Musika Banda

Abuztuak 18, osteguna, Antonio Orozco

Abuztuak 19, ostirala, Protocolo Kaoshy

Abuztuak 20, larunbata, Michael Jackson, la leyenda, musikala