Bidehuts zigiluak 'Mirailak' bilduma aurkeztuko du ostiralean Donostian

Abenduaren 1ean, Mirailak bilduma argitaratu zuen Bidehutsek, zigiluaren hamargarren urtemuga ospatze aldera. Disko horrek Bidehutseko kide diren musikarien moldaketak jaso ditu; guztira, hamar. Hain zuzen, moldaketa gurutzatuak dira lan horretan bildutakoak; hau da, Bidehutseko hamar taldek proiektu berberean parte hartu duten beste horrenbeste talderen abestiak moldatu dituzte.

Bi aste geroago, diskoa zuzenean aurkezteko ordua heldu da. Donostiako Intxaurrondo Kultur Etxean erakutsiko dute bilduma horretako edukia ostiral honetan, eta horixe izango da zuzeneko aurkezpen bakarra.

21:00etan, Anari, Audience, Joseba Irazoki, Inoren Ero Ni, Jupiter Jon, Lisabo, Mursego, Nire eta Sacco arituko dira bertan. Bidehutsetik argitu dutenez, artista bakoitzak ez du kontzertu oso bat emango, bederatzi taldek elkarrekin egindako zuzeneko bat izango baita. Sarrera guztiak agortuta daude.