Albisteak
Bira
Su Ta Gar taldeak lau kontzertu iragarri ditu hurrengo asteetarako
LUZIA ZUGADI | EITB.EUS
Urtarrila eta otsaila bitartean, Donostian, Alegian, Baionan eta Durangon izango dira Su Ta Gar taldekoak.
Urteak pasa ahala, geroz eta energia gehiago erakusten dute Su Ta Gar taldekoek. Azkenaldian oholtzatik jaitsi gabe dabiltza gipuzkoarrak, eta badirudi urtarrila eta otsaila bitartean ere agertokiz agertoki ibiltzeko asmoa dutela.
Larunbat honetan, esaterako, Donostian dute hitzordua, Doka Kafe Antzokian. 20:30ean irekiko dituzte ateak, eta ordu erdi geroago hasiko da Aitor Gorosabelen eta taldekideen zuzenekoa.
Urtarrilaren 26an, berriz, Alegiako gaztetxea bisitatuko dute. Egun bat geroago ere taula gainean izango dira, kasu honetan, Baionako Zizpa gaztetxean.
Bukatzeko, otsailaren 24an Durangoko 40 Minutu Rock jaialdian arituko dira. Hantxe egongo dira, besteak beste, Glaukoma eta Gatibu taldeak ere.
