Albisteak

Apiriletik maiatzera

Ostiralean abiatuko da MAZ Basauri jaialdia

ERREDAKZIOA | EITB.EUS

Apirilaren 27an eta 28an eta maiatzaren 4an eta 5ean egingo dute jaialdia. Doako kontzertuak antolatuko dituzte kalean; Social Antzokiko emanaldiek, berriz, prezio merkeak izango dituzte.

  • Sidonie

    Sidonie

Itxaronaldi luze baten ostean, iritsi da, azkenik, MAZ Basauri zikloa. Zazpigarren edizioa apirilaren 27an eta 28an eta maiatzaren 4an eta 5ean egingo dute. Aurten ere, doako kontzertuak antolatuko dituzte kalean (apirilaren 28an izango dira). Social Antzokiko zuzenekoei, berriz, prezio merkeak jartzen saiatuko dira antolatzaileak.

Hala, besteak beste, Sidonie, La Casa Azul, Novedades Carminha eta Willis Drummond gonbidatu dituzte jaialdira, baita Rufus T. Firefly, Biznaga, Vulk eta Chico y Chica ere.

Gainera, ohi bezala, talde berrien aldeko apustua egingo du MAZ Basaurik, Rockein lehiaketarekin elkarlanean. Hartara, Los Cosmeticos, Rockein lehiaketaren sail nagusiko iazko irabazlea, arituko da Basaurin. Halaber, Noga (2017ko finalistak), Kiñubak (euskal talderik onena) eta TOC (publikoaren saria) taldeen emanaldiak hartuko ditu jaialdiak.

Bukatzeko, aipatzeko modukoa da etxeko txikienei zuzendutako Txiki MAZ ekimenak ere izango duela lekua bertan.

Sarrerak

Sarrerak 10-12 euroan salduko dituzte; apirilaren 28koak salbu (8-10 euro). Gainera, lau eguneko bonua 30 euroan egongo da eskuragarri.

Egitaraua, egunez egun

Apirilak 27

Social Antzokian

21:30ean: Sidonie, Rufus T. Firefly

Apirilak 28

Kalean, doan

12:30ean: Txiki MAZ

18:00etan: Noga + Kiñubak + TOC

Social Antzokian

21:00etan: Willis Drummond, Biznaga, Los Cosmeticos

Maiatzak 4

Social Antzokian

21:30ean: La Casa Azul eta Chico y Chica

Maiatzak 5

Social Antzokian

21:00etan: Novedades Carminha, Vulk, Cecilia Payne

Sarrerak otsailaren 22tik aurrera egongo dira salgai.