Albisteak
Ekainaren 1ean eta 2an
Eibarko Ez Dok Fest jaialdiak kontzertuen egunez eguneko banaketa iragarri du
LUZIA ZUGADI | EITB.EUS
Ostiraleko sarrerak 25 euroan daude salgai; larunbatekoak, berriz, 30 euroan. Bi eguneko bonua 49 euroren truke eskura daiteke. Jaialdia ekainaren 1ean eta 2an egingo dute Unbe kirol-gunean.
Eibarrek Ez Dok Fest jaialdiaren estreinako edizioa hartuko du datorren hilabetean. Unbe kirolgunean bi eguneko kontzertu-zikloa egingo dute, eta Euskal Herriko zein Espainiako Estatuko talde ezagunak arituko dira bertan.
Hain zuzen ere, ekainaren 1ean eta 2an hartuko ditu Gipuzkoako aipatu udalerriak Toundra, Belako, Viva Belgrado eta Berri Txarrak taldeen zuzenekoak.
Duela egun batzuk hirukote nafarraren emanaldiarekin itxi zuten lehenengo edizio honetako egitaraua, eta azken orduotan zehaztu dute zein izango den kontzertuen egunez eguneko banaketa.
Hala, ostiralean, Toundra, Belako, Nerabe, Joseba B. Lenoir, Dead Bronco, Jardin de la Croix, Viva Belgrado eta Vulk igoko dira agertokira.
Bigarren egunean, larunbatean, berriz, Berri Txarrak, Comité Electrico, Doblecapa, Mud Candies, The Soulbreaker Company, Melange, Kokein, Futuro Terror, Biznaga eta Cuchillo de Fuego taldeen txanda izango da.
Sarrerak
Sarrerak jaialdiaren webgune ofizialean eros daitezke, baita Ezdok tabernan ere.
Bonuak 49 euroan daude salgai (+ banaketa gastuak). Hasiera batean ez zuten eguneko sarrerarik jarri, baina sare sozialetan hainbat kexa jaso ostean, 25 euroan salduko dituzte ostiraleko sarrerak, eta 30 euroan, larunbatekoak.
