EAE-ko Hauteskundeak 2024 -

EH Bildu

Otegi gaitasungabetuta dagoela berretsi du Hauteskunde Batzordeak

Hauteskunde organoak ez ditu defentsaren argudioak aztertu, eta hautagai abertzaleak bi gaitasungabetze zigor dituela egiaztatu besterik ez du egin.

Arnaldo Otegi. EFE
Arnaldo Otegi. EFE
Arnaldo Otegi: 'Akats juridiko larria da nire gaitasungabetzea'

0:31

AGENTZIAK | ERREDAKZIOA

Whatsapp Facebook Twitter Telegram Email

Gipuzkoako Hauteskunde Batzordeak ebatzi du EH Bilduk ezin duela Arnaldo Otegi hautatu lehendakarigai gisa irailaren 25eko hauteskundeetarako, Auzitegi Nazionalak kargu publikoan aritzea debekatu eta sufragio pasiborako eskubidea kendu baitzion Bateragune auziko kondenan.

Koalizio abertzaleak bi eguneko epea du orain erabakiaren aurka helegitea jartzeko. Izan ere, hauteskunde organoak astelehenean aldarrikatuko ditu alderdien zerrendak.

Legearen arabera, EH Bilduk beste lehendakarigai bat izenda dezake, baina koalizio abertzaleak ohartarazi du ez duela halakorik egingo, eta eutsi egingo diola Otegiren hautagaitzari.

Otegiren defentsak argudiatu duenez, kargu publikoan aritzeko debekuan akats tekniko bat dago, epaian ez ziotelako zehaztu zer kargu dituen debekatuta. Iker Casanova preso ohiari berdin gertatu zitzaion, eta legebiltzarkide bihurtu ahal izan zen.

Botoak jasotzeko eskubidea (sufragio pasiboa) izateko debekuari dagokionez, zigor hori Otegi espetxetik atera zenean amaitu zela esan du Iñigo Iruin abokatuak.

Nolanahi ere, Gipuzkoako Hauteskunde Batzordeak ez ditu argudio horiek aztertu, eta hautagai abertzaleak gaitasungabetzeko kondenak dituela egiaztatu besterik ez du egin. Horrenbestez, bide judiziala abiatu beharko du EH Bilduk.

Hau zure interesekoa bada, baliteke beste gai hauek ere izatea
Arnaldo Otegi Politika Euskal Autonomia Erkidegoa Hauteskundeak Euskadin Alderdi politikoak bideoak EH Bildu Gipuzkoa Hauteskundeak Gaurko azken ordukoa