Buruz Burukoa
22-18 Idoateren aurka
Irujok finalerako txartela lortu du
Erredakzioa
Iberoko pilotariak 22-18 irabazi dio Mikel Idoateri Eibarko Astelena pilotalekuan jokatu den Buruz Buruko finalerdietako partida.
Juan Martinez de Irujok Buruz Buruko txapelketako finalerako txartela lortu du finelardietan Mikel Idoateri 22-18 irabazita. Ikuskizun polita eskaini dute bi pilotariek Eibarko Astelena pilotalekuan.
Idoatek hasiera bikaina eman zion partidari 0-6ko partziala lortuta, baina azkar etorri zen Irujoren erantzuna aldeak murriztuz (5-6). Iberokoak, parekatu egin zuen partida, baina Mikel Idoatek berera jarritu zuen eta berriro sei tantuko aldea lortu zuen (6-11).
Sendo zebilen Idoate, baina Irujok ez zuen behera egin eta 10-0eko partzialarekin markagailua irauli zuen (16-11). Azken partzial hau kolpe latza izan zen Idoaterentzat. Mikelek, ordea, erantzuteko indarrakl izan zituen eta tanto bakarrera gerturatu zen (17-16).
Irujok, bi tanto jarraian egin zituen eta 19-16ko aldeko emaitza eskuratu zuen. Bazirudien partida ia erabakita zegoela, baina Idoatek berriro erreakzionatu, eta markagailua asko estutu zuen (19-18).
Partidako azken txanpan, ordea, fisikoki behera egin zuen Mikel Idoatek eta Irujo zuzenean 22. tantora iritsi zen. Azken emaitza, 22-18 izan zen Irujoren alde eta Iberokoak finalerako txartela lortu zuen.
Buruz Buruko txapelketako bigarren finalista, Olaizola II-Bengoetxea VI partidako irabazlea izango da.
