Italiako Giroa 2024
21. etapa
Dumoulin, garaile Giroan; erlojupekoa, Van Emdenentzat
Mikel Dominguez | eitb.eus
Sunweb taldeko txirrindularia Italiako lasterketa irabazten duen lehen neerlandarra da. Quintanak bigarren egin du, eta Nibalik hirugarren. Landarentzat izan da mendiko maillota.
Albisteak (3)
Tom Dumoulinek (Team Sunweb) irabazi du Italiako Giroa, 21. etapako 29,3 kilometroko erlojupeko lauan aurkariak baino hobea izan ostean. Amestutako etapa izan du holandarrak laugarren postutik lehenengora salto egiteko, 53 segundoko aldeari buelta emanda. Nairo Quintanari (Movistar) kendu dio maglia arrosa Milaneko helmugan.
Jos Van Emdenentzat (LottoNL-Jumbo) izan da etapa garaipena, 33' 8''-ko denbora eginda. Bi ordu baino gehiagoz egon da etapa amaieraren zain, hau da, Dumoulinek zein denbora egiten zuen zain. Azkenean, bigarrena izan da garailearen herrikidea, helmugan 15'' galduta.
Lehenengo aldiz irabazi du Herbeheretako txirrindulari batek Italiako Giroa, eta lehenengo itzuli handia izan da Dumoulinentzat. Erlojuaren aurkako lanean eta aldapan gora bikain eutsita lortu du garaipena, nahiz eta taldearen laguntza ez izan.
Garaipen orokorraz gain, Duomon podiumeko beste bi koskak ere zeuden jokoan. Dumoulinen denborarekin, italiarra eta kolonbiarra bigarren postuaren lehian izan dira. Nabarmena izan da hiru asteteetan zehar indar asko gastatu direla.
Kasu honetan ez dira pronostikoak bete, eta Vincenzo Nibalik (Bahrain-Merida) Dumoulinek baino 54 segundo gehiago behar izan ditu erlojupekoa bukatzeko. Quintanak, aldiz, 1' 24'' behar izan ditu. Hala ere, bigarren postuari eusteko denbora nahikoa izan da.
Sailkapen orokorrean, beraz, Nibali 31''-ra geratu da, eta Quintana 40''-ra. Thibaut Pinotek (FDJ) hirugarren postuan hasi du etapa, baina erlojupeko txarraren ondorioz laugarrenean bukatu du, 1' 17''-ra.
21. ETAPAKO SAILKAPENA
