Musika
Flamenkoa
Flamenco on Fire jaialdiak gaueko egitarau osagarria izango du
Agentziak | Erredakzioa
Abuztuan Iruñean egingo duten jaialdiaren bigarren edizioan, Jorge Pardo, Estrella Morente eta Carmen Linares egongo dira, besteak beste.
Flamenco on Fire Iruñeko flamenko jaialdiaren bigarren edizioan, gaueko kontzertuen zikloa egingo dute, antolatzaileek gaur iragarri dutenez. Ikuskizun sorta horretan, besteak beste, Farruquito eta Juan eta Josemi Carmona arituko dira.
Ikuskizunok Tres Reyes Iruñeko hotelean paratuko duten agertoki batean gauzatuko dituzte. Lehen egunean, abuztuaren 26an, Farruquito eta Juan Ramirez eta Ivan Vargas dantzariak izango dira, 23:30etik aurrera; hilaren 28an, Josemi Carmona, Javier Colina eta Bandolera; eta hilaren 30ean, Juan Carmona, Saul Quiros eta Enrique Morente.
Jorge Pardo, Carmen Linares, Estrella Morente…
Abuztuaren 22tik 30era, Sabicas flamenkoaren maisuaren jaiotiriak Flamenco on Fire hartuko du, eta, bertako egitarauan, estilo horretako izen handienetako batzuk ageri dira: Remedios Amaya (‘Del corazon al aire’ estreinatuko du); Carmen Linares, Jorge Pardok, Toni Di Geraldok eta Carles Benaventek lagunduta; Manuel Carrasco eta Antonio Canales; Dorantes eta Marina Heredia; eta Espainiako Ballet Nazionala.
Halaber, Farruquito, Maria Juncal, Jorge Pardo eta Estrella Morente ere igaroko dira nafar hiriburutik bederatzi egun horietan. Azken horrek “El amor brujo” Manuel de Fallaren lana taularatuko du, Nafarroako Orkestra Sinfonikoaren laguntzaz, idatzi zenetik 100 urtera
