kultura
Asterix eta Obelix
Asterix eta Obelix berria kalean, euskaraz ere eskuragai
Eitb.eus
Salvat argitaletxeak 'Zesarren papiroa' izenburua duen ale berriaren euskarazko 4.000 ale banatuko ditu.
Iritsi da komiki europar klasikoenaren zaleek gogotsu itxaroten zuten eguna. Gaur jarriko da salgai Asterixen -galiar txiki, atsegin eta menderaezinaren- bilduma berri bat, Zesarren papiroa, hain zuzen ere. Aurrekoa atera eta bi urteren buruan argitaratu dute Asterix eta bere ezin bananduzko abenturakide Obelixen istorioak biltzen dituen oraingo alea. René Goscinny eta Albert Uderzo dira komikiaren jatorrizko sortzaileak.
Komiki-sortaren 36. zenbakia da, eta Jean Yves Ferri (testua) eta Didier Conrad (marrazkiak) egileen eskutik dator. Emanaldi berri honen bikote sortzailea orain dela bi urte Asterix eta piktoak plazaratu zuen bera da. Ale horren 5 milioi kopia saldu ziren mundu guztian barrena. Dena dela, Uderzoren ikuskapen zorrotzarekin egin dute lan. Bera da jatorrizko sortzaileetatik bizirik geratzen den bakarra, Goscinny 1977an hil baitzen.
Salvat argitaletxeak argitaratzen duen titulu berria ere banaketa-zenbaki potoloekin dator. Zenbaki horien artean, besteak beste, euskaraz plazaratuko diren 4.000 aleak daude. Horiez gain, Estatutuko liburu-dendek 160.000 ale jarriko dituzte salgai gaztelaniaz; 25.000, katalanez; 3.000 galegoz eta 1.500 asturieraz.
Euskarazko egokitzapena egiteaz Maialen Arzallus itzultzaile eta bertsolaria arduratu da.
