Zinema
Jaialdia
'Django'k zabalduko du euskal ordezkaritza izango duen Berlinale
Efe | Erredakzioa
Alex de la Iglesiak “El bar” filmaren nazioarte mailako estreinaldia egingo du Alemaniako jaialdian, eta Eneko Atxaren inguruko dokumental batek irekiko du gastronomia atala.
Berlinaleren 67. edizioa ‘Django” filmak zabalduko du, jaialdian Urrezko Hartza irabazteko lehen hautagaiak. Hamaika egunez, izar dirdiratsuen presentzia eta herritarrentzako ekitaldi irekia izateko asmoa uztartzen saiatuko dira jaialdiaren antolatzaileak.
Batik bat Berlinalen lehiaketatik kanpo ikusiko diren filmek erakarriko dituzte izarrak Berlinera, eta, besteak beste, Catherine Deneuve, Penelope Cruz, Hugh Jackman, Ethan Hawke eta Robert Pattinson egongo dira.
Lehian dauden pelikulak bultzatzera, berriz, Richard Gere eta Laura Linney (“The dinner”) eta Bruno Ganz eta Kristin Scott Thomas (“The party”) bertaratuko dira.
Paul Verhoeven herbeheretar zuzendaria buru duen epaimahaia arduratuko da jaialdiko Hartzak banatzeaz, eta Diego Luna mexikar aktorea, Olafur Eliasson islandiar artista eta Julia Jentsch aleman aktorea izango ditu lagun zeregin horretan Verhoevenek.
Hartzak lortzeko borrokatik kanpo, Alex de la Iglesia bilbotar zinemagileak “El bar” filmaren nazioarteko estreinaldia egingo du Berlinen.
Horrez gain, Berlinen egongo dira “Logan”, Hugh Jackman “X-men” sagako bere pertsonaiaren larruan erakusten duen filma, eta “T2 Trainspotting”, Ewan McGregorrek jatorrizko filma egin zutenetik 20 urte pasatuta berriz egin duen filma.
Euskal zinema
De la Iglesiaren filmaren estreinaldiaz haraindi, Eneko Atxa bizkaitar sukaldariaren inguruko dokumental batek irekiko du jaialdiko sukaldaritza atala, eta euskal ikus-entzunezkoen sektorearen ordezkari talde bat Berlinen egongo da, Basque Audiovisual izenpean, 26 proiektuko katalogo bat aurkezteko.
Proiektu horietako gehienak garapen fasean daude, eta hamabi dokumental, fikziozko bederatzi pelikula eta animaziozko bost film dira. Batzuk, nolanahi den, iaz estreinatu ziren: "El ataúd de cristal", "Gutik zura", "Pixi Post eta opari-emaileak", "Acantilado", "Pikadero", "The glass coffe", "Teresa eta galtzagorri" eta "Central Africa's closed eyelids".
