Loteriak 4,7 milioi banatu ditu Bilbo, Abadiño eta Portugaleten

Erregetako Loteriaren sari nagusia 55.487 zenbakiari egokitu zaio, eta Madrileko Leganes auzoan saldu dute osorik. Euskal Herrian, halaber, zoriona ere izan da, baina soilik Bilbon, Portugaleten eta Abadiñon (Bizkaian) saldu dira bigarren eta hirugarren sarietako hainbat txartel. Guztira, 4,7 milioi euro banatu ditu Erregetako Loteriak Bizkaian.

Aipatu bezala, zozketaren sari nagusia, bi milioiko saria serie bakoitzeko (200.000 euro dezimo bakoitzak) 55.487 zenbakiari dagokio. Hala, sari potoloaren txartel guzti-guztiak Leganeseko 4 zenbakiko saltokian saldu dira.

Gurean ere diru apurra zabaldu da, bigarren eta hirugarren sariek utzitakoa, alegia. Bigarren sariak, 43.743 zenbakidunak, Abadiñon eta Bilbon banatu du dirua. Bigarren saria 750.000 euro eta 75.000 serie eta dezimo bakoitzeko, hurrenez hurren, eman ditu.

3 milioi euro Abadiñora

Abadiñok jaso du sari potoloena: bertako Loteria administrazioak 3 milioi euro banatu ditu gaur, bigarren sariari esker. Administrazio horretako jabeetako batek azaldu duenez, zenbaki horren lau serie erostea erabaki zuten, bizilagun batek astero eskatzen zuelako. 40 dezimo horiek lehiatilan saldu zituzten.

Zenbaki horretako beste serie bat, 750.000 euro, Ormaetxean saldu da, Bilbon. Administrazio horrek 9 milioi euro banatu zituen abenduaren 22ko zozketan.

Bilboko 30. Loteria Administrazioak ere bigarren sariaren serie bat saldu du eta, horrenbestez, beste 750.000 euro banatu ditu. Azken sei urteetan eman duen sari potolo bakarra izan da.

Hirugarren saria, 250.000 euroko sariarekin (serie bakoitzeko), 84.222 zenbakiari egokitu zaio eta Portugaleten, besteak beste, saldu da. Guztira, 250.000 euro banatu dira Portugaleten.

Lau zenbakiko sariak (3.5000 euro serie bakoitzeko), hiru zenbakikoak (1.000 euro) eta bi zenbakikoak (400 euro) honako hauek izan dira:

3.500 euroko saria serie bakoitzeko: 6691 eta 6989 zenbakiak

1.000 euroko saria, serie bakoitzeko: 794, 285, 762, 508, 881, 635, 296, 369, 545, 466, 658, 668, 692 eta 873

400 euro: 34, 69, 25, 92 eta 09 zenbakietan bukatutako txarteletan.