04.536 zenbakiak dirutza utzi du Bilbon eta Sestaon

04.536 zenbakiari egokitu zaio Gabonetako Loteriaren bigarren saria, eta zortea alde eduki dugu euskaldunok, Sestaon eta Bilbon dirutza banatu baitu. Zehazki, lau milioi euro banatu dira bi herriotan. 

Serie bakoitzak 1.250.000 euroko saria du, eta, horrenbestez, dezimo batek, 125.000 eurokoa.

Hala, zenbaki txiki horrek sari handia utzi du Sestaon eta Bilbon, hiru serie pasatxo saldu baitira. Ezkerraldeko herrian, Llanas kaleko 13. zenbakian dagoen loteria administrazioan bi serie eta bi dezimo saldu dituzte. Guztira, 2.750.000 euro banatu dituzte saritan.

Bilbon, Azcarreta saltoki ezagunean (Areatza), 10 dezimo (serie bat) saldu dituzte. Zorioneko daude loteria administrazio honetan, bosgarren sarietako bat ere saldu baitute. 1.250.000 euro banatu dituzte 04.536 zenbakiarekin.

Horrez gain, bigarren sari honen dezimoak saldu dira Euskal Herriko hainbat herritan: Gasteizen (Nafarroako Erregeak 36; Antso Jakitunaren Hiribidea, 2; eta Boulevard merkataritzagunea), Hernanin (Juan de Urbieta, 12), Pasaian (Nafarroa etorbidea), Iruñean eta Tuteran.

Sariaren zati bat, Sestaoko liburu-denda batean

Sestaon, Las Lllanas liburu-dendan 04.536 zenbakiaren partizipazioak saldu ditu Naiara Somalo dendariak, eta ohiko bezeroen artean banatu duenez, cavarekin ospatu du gaurkoan.

Somaloren hitzetan, txartel berezi batzuk osatu zituen lau zenbaki ezberdinekin, eta zenbaki bakoitzetik bost euro jokatzen zuten bezeroek.

Somalo pozarren azaldu da, bere kasuan behintzat, "langileei, erretiratuei eta langabeei" egokitu zaielako saria.

Azcarretan, dezimoak banan-banan saldu dituzte

Kamera eta kazetari andana bildu da Bilboko saltoki ezagunean. Azcarretako nagusiak "pozarren" daudela esan dute, bi sari eman baitituzte. "Ikaragarria da! Zaila da sari bat banatzea, pentsa bi...", esan du Cristina Garcia Azcarreta loteria saltzaileak.

Haren hitzetan, "saria oso banatuta" dago, eta azaroan saldu omen zituzten dezimo guztiak, banan-banan.

Azcarreta saltokikoak, ospatzen. EFE

Bigarren sari honek 625.000 euro banatu ditu Gasteizen eta Gipuzkoan, bost dezimo saldu baitituzte. Gasteizen horrela ospatu dute: