Emakume batek bere alaba Facebook bidez aurkitzen du 19 urte geroago

Emakume batek bere alaba aurkitu du Facebook bidez, sare sozialeko profil guztietan bilatu ondoren. Worcestershire konderrian (Erresuma Batua) bizi den emakume horrek, Sarah Mowbray, bere alaba Kayleigh Marie adopzioan eman behar izan zuen 1995. urtean, egoera ekonomiko latza baitzuen.

19 urte pasatu diren arren, Sarah Mowbrayk ez du inoiz amorerik eman. Behin eta berriz saiatu da bere alaba aurkitzen. Horretarako bide desberdinak erabili izan ditu. Baina, emaitzak lortzen ez zituela ikusita, Facebook bidez bilatuko zuela erabaki zuen. Hortaz, 41 urteko emakumeak bere alabaren izena idatzi zuen sare sozial horretan. 'Kayleigh Marie' idatzi ostean, ehunka emaitza agertu zitzaizkion.

“Nik ez nekien bere abizena zein zen, beraz, ‘Kayleigh Marie’ idatzi nuen eta ehunka pertsona agertu ziren. Nire alaba aurkitzea ezinezkoa izango zela pentsatu nuen orduan”, adierazi zuen Mowbrayk Daily Mail egunkarian.

Hala eta guztiz ere, emakumeak ez zuen amore eman eta bilaketaren emaitzak banan-banan aztertu zituen. Azkenean, lan latza egin eta gero, bere alabarekin bat zetorren emaitza bat topatu zuen: Malcern-en (Worcestershire) bizi zen 22 urteko Kayleigh Marie Watts aurkitu zuen. Neskaren profileko argazkia ikusi bezain laster, elkarren antza zutela baieztatu ahal izan zuen Mowbrayk.

Beraz, lagun eskaera bidali zion Kayleigh Marie Wattsi. Honek lagun eskaera onartu zuen, eta hitz egiten hasi ziren. Mowbray eta Watts 5 hilabete aritu dira elkarri Internet bidez mezuak bidaltzen, eta, azkenean, “mundu errealean” batzea erabaki zuten.

“Nire ama biologikoa aurkitu dut, eta gauza asko ditugu komunean, elkarrekin dugun antza izugarria da”, baieztatu zuen Wattsek. Daniel 17 urteko bere neba eta bere amaren bikotekidea ere ezagutu ditu jada.