Euskadik 15 urte egin du atzera, 150.000 lanpostu suntsitu ondoren

Euskal Autonomia Erkidegoko ekonomiak 15 urte atzera egin eta % 15eko langabezia tasa berreskuratu du, 2013ko hirugarren hiruhilekoko datuak ikusita. Eustaten arabera, langabezia tasa % 14,8koa da eta 158.000 lagun lan bila ari dira.

Euskadik 'urrezko garaia' bizi izan zuen 2007. eta 2008. urteetan: Garai horretan, langabezia tasa % 5ekoa zen eta 60.000 lagun zeuden Inemeko zerrendetan.

Atzeraldiak orain lau urte jo zuen Euskal Autonomia Erkidegoa. Ordutik, 150.000 lanpostu suntsitu dira, 20.000 autonomo gutxiago daude eta 8.000 enpresek ateak itxi dituzte.

Horrenbestez, euroan sartu aurreko datuak berreskuratu ditu Euskadiko ekonomiak. Batez-besteko pentsiorik altuenak eta zerbitzu publiko bermatuak dituen erkidego batentzat datu kezkagarriak dira.

Horrez gain, biztanleria zahartzen joango da 2020. urtetik aurrera, Eustaten arabera, eta horrek pentsioen eta osasun zerbitzuen gastuak igo egingo ditu.

Bestalde, industriak ere pisua galdu du zerbitzuen alorrarekin alderatuz: egun, lanpostuen % 70 zerbitzuetan ematen da (industrian % 21 eta eraikuntzan % 5).

1999. urtean langabezia-tasa % 15ekoa zen, eta gazteen artean % 25era izatera iritsi zen. Urte horretan, gutxieneko soldata 69.000 pezetakoa zen.