Krisi Ekonomikoa -
Durao Barrosori erantzuna
Espainiako Bankuaren ikuskaritzak defendatu ditu Gonzalez Paramok
BBVAko kontseilari exekutiboak Emilio Botin Santanderreko presidentearekin bat egin du, Durao Barroso Europako Batzordeko presidentearen kritiken aurrean.
Erredakzioa
Jose Manuel Gonzalez Paramo BBVAko kontseilari exekutibo eta Europako Banku Zentraleko zuzendaritzako kide ohiak finantza krisian Espainiako Bankuak izandako jokabidearen alde egin du. Horrez gain, erakundeko ikuskatzaile taldearen "kalitate teknikoa" nabarmendu du, neurri "aurreratuak" hartu baitzituen bizigarri dinamikoak bideratuta.
"Ez dut esan nahi Espainiako Bankuaren jokabidea biribila izan denik, baina, alor teknikoan, horren kalitatea aitortu behar da", azaldu du Gonzalez Paramok 'Krisia atzean utzi duen Europa' mintegian. Mintegia Menendez Pelayo Unibertsitateak antolatu du, Informazio Ekonomikoaren Kazetarien Elkartearekin batera, eta BBVAk babestu du.
Gainera, BBVAko kideak gogora ekarri du Europako Banku Zentraleko zuzendaritzako kideen % 30 Espainiakoak direla eta batez ere Espainiako Bankuan lan egindakoak direla. Gonzalez Paramok ez du higiezinen burbuilaren arduradunak zeintzuk diren zehaztu nahi izan, baina Espainiako ikuskaritzak Gobernuari eskumenak "aberriratzeko" eskatu behar izan zuela esan du. "Erkidegoek eskumen gehiegi zituzten", adierazi du.
Barrosori erantzuna
Horrela, BBVAko kontseilari exekutiboak bat egin du Emilio Botin Santander Bankuko presidenteak Espainiako Bankuaren alde esandakoekin, Durao Barroso Europako Batzordeko presidenteak Espainiako krisiaren errua Espainiako Bankuari bota ostean.
"Ez da zalantzan jarri behar Espainiako Bankuko ikuskaritza taldearen kalitate teknikoa", azpimarratu du Gonzalez Paramok; izan ere, horren ustez, Espainian krisia "aldizkakoa eta sektoriala" izan balitz, bizigarri dinamikoak ahulezia ekonomikoei aurre egiteko gai izango ziratekeen.
