'Ulermen bideen' metafora gisa erabili du trena Rajoyk

Mariano Rajoy Gobernuko presidentea Bartzelona eta Girona-Figeras arteko AHT Abiadura Handiko Trenaren inaugurazioan egon da eta batasuna defendatzeko metafora gisa erabili du trena, "ulermen eta distantziak laburtzeko bidea" izan behar duela esanez, Kataluniako Gobernuaren independentzia asmoei erantzunez.

Masen eta Rajoyren arteko topaketa irrikaz espero zen, baina protokolozko ekitaldia izan da. Lau lagunentzako mahai batean egin dute bide berria, Felipe printzearekin eta Ana Pastor Sustapen ministroarekin batera.

Katalunia hiriburu guztiak abiadura handiko trenaren bidez lotu dituen lehen erkidegoa izan dela azpimarratu du Rajoyk. Europa erdialdeko herriekin lotura izango duela eta Espainia osoan eragin positiboa izango duela gaineratu du. Halaber, Espainiak Katalunian egiten dituen inbertsioak nabarmendu ditu; izan ere, "gizarte eta herrialdeko lehen mailako produkzio ekonomia gisa merezi du", esan du.

Espainiak Katalunian egiten duen inbertsioa kritikatu du Masek

Artur Masek, bere aldetik, kritikak zuzendu dizkio Gobernuari; izan ere, horren esanetan, "Espainiako barne produktu gordinean ekarpen handiena egiten duen erkidegoa izan arren, Katalunia da azpiegitura publikoetan inbertsio txikienak jasotzen dituena".

Printzeak kohesio gisa goraipatu du trena

Azkenik, "herrialdearen egiturarako eta hazkunde ekonomikorako" abiadura handiko sarearen garrantzia azpimarratu du Asturiaseko printzeak. Halaber, Espainia mundu osoan "imitatzeko eredua" dela esan du.