Ekonomia -
Lan-istripua Nafarroan
Nekazari bat traktore batek harrapatuta hil da, Martzillan
Makinak biktima harrapatu eta aurretik eraman du. Suhiltzaileek gorpua erreskatatu behar izan dute. Makinaren helizeek biktimari zauri sakonak egin dizkiote.
Erredakzioa
64 urteko nekazari bat hil da gaur arratsaldean, Martzillan (Nafarroa), traktore baten makinaren helizeek harrapatuta. Ezbeharra Las Planillaseko lur-sail batean jazo da, nekazaria lanean ari zenean.
Nafarroako Gobernuak jakitera eman duenez, istripua 18.26 aldera gertatu da. Makinak biktima aurretik eraman eta harrapatu du.
Peraltako mediku talde bat bertaratu da, baina ezin izan du ezer egin; izan ere, makinaren helizeek egindako zauri sakonak zituen gorpuak. Suhiltzaileek hildakoaren gorpua erreskatatu behar izan dute.
Las Planillaseko lur-saila Martzillako erdigunetik bost kilometrora dago.
Foruzaingoa gertakaria ikertzen ari da. Biktimaren gorpua Nafarroako Auzitegiko Medikuntza Institutura eraman dute, bertan autopsia egiteko.