Behin-behineko espetxealdia Miguel Blesarentzat

Marsans enpresari emandako kreditua ikertzen duen epaileak berehala deklaratzera deitu du Miguel Blesa, City National Bank of Florida bankuaren erosketaren inguruan galdeketa egiteko.

Madrilgo 9 zenbakiko instrukzio auzitegiko epaileak behin-behineko espetxealdia ezarri dio Miguel Blesa Caja Madrideko presidente ohiari, City National Bank of Florida bankuaren erosketan izandako ustezko irregulartasunengatik, auzitegietatik jakitera eman dutenez.

Caja Madridek Marsans enpresari 26,6 milioi euroko kreditu kobraezina eman izana ikertzen duen epaileak hartu du espetxeratzeko erabakia, City National Bank of Florida bankuaren erosketa dela-eta Blesa berehala deklaratzera deitu ondoren. 500 milioi euroko galerak eragin zituen Caja Madriden City National Bank de Florida bankua erosteak.

Marsansen kreditua dela-eta aurretik aurkeztutako helegiteari informazio osagarria gehitu zion Manos Limpiasek, bankuaren erosketa ikertzeko eskaria gehitzeko.

Epaileak eskari hori onartu du, eta Espainiako Bankuaren txosten bat jaso ondoren hartu du Blesari behin-behineko espetxealdia ezartzeko erabakia. Txosten horretan jasotzen denez, ikuskatzaileek uste dute balitekeela erosketa hori ''Madrilgo Ogasun eta Ekonomia Sailaren kontrola saihestuz'' egin izana.

3 milioi euroko bermea jarri diote Blesari, baina Elpidio Jose Silva epaileak 2,5 milioi euroko fidantza jarri dio Caja Madrideko presidente ohiari, iturri judizialek gaur jakinarazi dutenez.