'Kutxen Legea onartuta Euskal Herriak ez du subiranotasunik izango'

EH Bilduk salatu duenez, EAJ eta PP alderdiek Kutxen eta Banku Fundazioen Legearen proiektuaren inguruan lortutako akordioak "kutxak likidatu egingo ditu, eta Euskal Herriaren subiranotasunaren kontra egingo du".

Donostian egindako prentsaurreko batean Ainhoa Beola Kutxako Administrazio Kontseiluko kideak eta Arantza Urkaregi BBKko Batzar Nagusiko kideak ohartarazi duenez, "Troikaren helburua", aurrezki kutxen gaineko erreformaren bidez, entitate horiek duten "izaera soziala eta publikoa" galdu eta "merkataritza-banku" bihurtuko dituzte.

EH Bilduko bi ordezkariek EAJk eta PPk "hasieratik" Troikak egindako "exijentziari men egitea" deitoratu dute, "euskal gizartearen lanaren eta aurrezkien bidez sortutako" euskal kutxek "ondorio latzak" izango dituztelako.

Testuinguru horretan kokatu dute EAJk eta PPk lortutako akordioa. "Jeltzaleak "onuragarri bezala aurkezten tematu dira" baina, "errealitatean ekartzen duena Troikaren agindua betetzea da eta, horrenbestez, kutxak desagertuko dira fundazio bihurtuko dituztelako, eta Kutxabanken akziodunek" ez dute erabateko kontrola izango.

"Nori salduko dizkiote akzioak? Hori da inork ere ez erantzuten ez duen galdera. Ez dute ziurtatzen Euskal Herriak izango duenik hiru kutxen gainean erabakitzerik eta -gainera- parez pare irekiko dizkiete ateak atzerriko inbertitzaileei", ohartarazi dute.