Ekonomia -
Protesta jendetsuak
Soldata izoztearen aurka protesta egin dute Frantziako funtzionarioek
Antolatzaileen arabera, 20.000 lagunek parte hartu dute Pariseko manifestazioan, herrialdeko jendetsuena. Frantziako hiri nagusietan manifestazioak deitu dituzte sindikatuek.
Redacción
Milaka funtzionariok soldata izoztearen aurka protesta egin dute gaur, Frantzian. Erosteko ahalmena berreskuratzea eskatu dute langile publikoek; izan ere, 2010az geroztik soldata izoztuta dute.
Sindikatu antolatzaileen arabera, 20.000 lagunek parte hartu dute Pariseko manifestazioan, herrialdeko jendetsuena. Poliziaren hitzetan, 10.000 pertsona bildu dira. Frantziako hiri nagusietan manifestazioak deitu dituzte sindikatuek.
"Langileen soldatek urte gehiegi eman dituzte izozturik dagoeneko", adierazi du Thierry Leapon CGT sindikatuko idazkari nagusiak. CGT, CFDT, CFTC, CGT, FA-FP, FSU, Solidaires eta Unsa sindikatuek protesta eta greba jardunaldia antolatu dute.
Soldatak, 2010az geroztik izoztuta
Frantziako ia bost milioi funtzionarioen soldata ez da 2010az geroztik aldatu, bere horretan mantendu dute. Gainera, funtzionarioen soldatek 2017ra arte izoztuta jarraituko dutela iragarri du Frantziako Gobernuak, egoera ekonomikoak hobera egiten ez baldin badu.
Bestalde, lanpostu publiko gehiago sortzea eskatu dute sindikatuek, "populazioaren beharrizanak artatzeko funtzionario kopuru egokia izan arte", CGTko buruzagiak azaldu duenez.
Funtzionarioen grebak hegaldien % 10 bertan behera utzi ditu, batez ere Frantziako hego-ekialdean, baina Madrilera bidean aireratu behar ziren beste bi hegaldi bertan behera utzi dituzte, beste bi Bartzelonara, bat Sevillara eta beste bat Valentziara.
