Ekonomia -
Ikerketa
NDF 'laster' bilduko da Lagarderen inputazioa aztertzeko
Gerry Rice erakundeko bozeramaileak esan du bilera 'ahal bezain lasterren' egingo dela, eta Lagardek ez duela dimisioa aurkezteko asmorik.
Erredakzioa
Nazioarteko Diru Funtseko Zuzendaritza Exekutiboa "laster" bilduko da Christine Lagarderen inputazioa aztertzeko, Gerry Rice bozeramaileak adierazi duenez. Tapie auzia dela eta, ustezko "ustelkeria" kasu bategatik inputatu dute Lagarde.
Ricek azaldu du zuzendaria "Funtseko lanera itzuli" dela, eta Zuzendaritza Exekutiboak, erakundeko organo erabakitzaileak, bilera egingo duela.
"Laster izango da bilera, ahal bezain lasterren", berretsi du Ricek Funtsak hamabost egunetik behin ematen duen prentsaurrekoan, baina ez du xehetasun gehiago eman.
Gainera, Lagardek ez duela dimititzeko asmorik adierazi du.
Prozesu judizialean zehar, Funtsak bere babesa eman zion Lagarderi. Honek atzo Parisen esan zuen inputazioa "erabat oinarrigabea" zela eta helegitea jarriko zuela.
Ustezko ustelkeriagatik abiatutako ikerketak argitu nahi du 2007an, Ekonomia ministroa zenean, Bernard Tapieri emandako 403 milioi euroko kalte-ordainaren atzean ustelkeria kasuren bat egon ote daitekeen.
