Langabezia kapitalizatzeko adin-muga bertan behera utzi du Rajoyk

Mariano Rajoy Gobernuko presidenteak larunbat honetan iragarri duenez, jarduera ekonomikoa abiatzeko balizko langile autonomo batek langabeziaren diru-laguntza kapitalizatzeko adin-muga ezabatuko du Gobernuak.

Rajoyk aurreratu duenez, Lan Autonomoaren Estatutuaren eta Ekonomia Sozialerako Sustapenaren eguneratzeak aurkeztuko ditu datozen asteetan. Dokumentu horrek "ordenatu eta sistematizatuko ditu autoenplegua suspertzeko egun indarrean dauden pizgarri guztiak, besteak beste, argitasun eta segurtasun juridiko handiagoa eskaintzeko asmoz".

Horrela mintzatu da Rajoy Ekintzaileen eta Langile Autonomoen II. Foroaren itxiera-ekitaldian. Langileen Elkarteen Federakuntza Nazionalak Kordoban antolatutako hitzordua izan da. Federazio horrek batzar nagusia egin du, eta Lorenzo Amor aukeratu dute berriro presidente datozen bost urteetarako. Guztira, 300 lagun bildu dira bertan, tartean, Juanma Moreno Andaluziako Gobernuko Presidentetzarako PPko hautagaia.

Gobernuko presidenteak azaldu duenez, "pizgarri eta neurri berriak aurkeztuko ditugu", esaterako, tarifa finkoaz baliatzen diren langile autonomoek langileak kontratatu ahal izatea (baina pizgarriak galdu gabe), edo edozein adineko ekintzaileek langabeziaren diru-laguntza osoa kapitalizatu ahal izatea, jarduera ekonomiko berria abiatzeko, besteak beste.