Ekonomia -
Bilera
Elkarri bizkarra eman gabe lan egitea defendatu dute Aierdi eta Tapiak
Ekonomia, teknologia, nazioartekotze eta turismo alorretan elkarrekin aritu daitezkeela uste dute Nafarroako eta Euskadiko bi gobernukideek.
AGENTZIAK | ERREDAKZIOA
Euskal Autonomia Erkidegoko eta Nafarroako instituzioek elkarri bizkarra eman gabe lan egitea defendatu dute Arantza Tapia Ekonomia Garapenerako eta Lehiakortasunerako sailburuak eta Manu Ayerdi Nafarroako presidenteorde ekonomikoak.
"Bi herrialde gara, bi erregio, nahi duzuen bezala esan, baina elkarrekin egin behar dugu lan", zehaztu du Arantza Tapiak. Haren esanetan, bi lurraldeek "interes berberak" dituzte ekonomian, teknologian, nazioartekotze politiketan eta turismoan.
Manu Ayerdik Tapiak esandakoarekin bat egin du eta esan du espero duela, "hainbeste urtez elkarri bizkarra eman ondoren", bi lurraldeak elkarlanean hastea "herritarren ongizatearengatik".
Irailean Iñigo Urkulluk eta Uxue Barkosek irekitako kolaborazio ildoaren baitan kokatzen da Tapiak eta Ayerdik Gasteizen gaur egin dute bilera.
Bilera horren ondotik, Barkos eta Urkullu bat etorri ziren bi lurraldeen arteko harremanak normalizatzeko, elkarlanean aritzeko eta harremanak berreskuratzeko beharra azpimarratzerakoan.
