Ekonomia -
Mobilizazioak
CAF Beasaingo langileek protesta egin dute kaleratzeen aurka
Zuzendaritzak behin-behineko 40-60 langile kaleratu nahi ditu. Langileen % 61ak mobilizazio egutegi berri bat onartu du batzarrean, enpresa-batzordeak proposatuta, kaleratzeen kontra protesta egiteko.
Erredakzioa
Beasaingo (Gipuzkoa) CAF enpresako dozenaka langilek protesta egin dute gaur udalerriko kaleetan, behin-behineko 40-60 langileren (pintoreak, argiketariak, muntatzaileak eta hodilariak) kaleratzeen aurka protesta egiteko. Zuzendaritzak datozen egunetan kaleratu nahi ditu.
Manifestaldia 10:00etan hasi da CAF Beasainetik gertu, ''Enpleguaren defentsan-kontratuen berritzeari bai'' lelopean. Kaleratuko dituzten langileentzako lanik ez dagoela argudiatu du enpresak. Protesta amaitu ostean, enpresak eta sindikatuek "formula alternatiboak" aurkitu behar dituztela esan du Adolfo Masid LAB sindikatuko ordezkariak.
LAB sindikatuak gehiengoa du enpresa-batzordean, baina ELAk, CCOOk eta ESKk ere ordezkaritza dute.
Gainera, langileen % 61ak mobilizazio egutegi berri bat onartu dute batzarrean gaur, enpresa-batzordeak proposatuta, kaleratzeen kontra protesta egiteko. Horrela, bi orduko lanuzteak egingo dituzte asteartean, asteazkenean eta ostegunean, eta asteazkenean manifestaldia egingo dute Ordizian.